Shillong, Rymphang 14
Ka jingïalehkai jong ka lympung Shillong Cricket League Super Division 2024-25 ba la pynïaid da ka Shillong Cricket League ha madan Polo ha ka Sngi Thohdieng ka la jam sha kaba kut ha kaba la sakhi ïa ka jingtbit jong u Mrinal Das ban btin lynti ïa ka Langsning CC sha ka jingjop da kaba khyrwit tam ïa ka spah ron ban pynliem ïa ka Donkin SCC.
Haba shimti ïa ka pali tied ba nyngkong, u Mrinal Das u la trei borbah da kaba thlieh haduh 128 run na ki 107 bol ban pynkynjoh ïa ka Lang-sning sha ka 264 run haduh kaba kut jong ki 42 over bad hap 7 wiket. U Ibit Thaba u la long uwei pat u rangïalehkai uba la kyrshan lang da kaba ïoh 44 run na ki 39 bol.
Napdeng ki ‘rang kawang bol ka liang pyrshah, u Wallambok u la shim 3 wiket/53 run na ki 9 over, katba u Gavineal Marpna u la shim 2 wicket/42 run na ki 9 over.
Haba pyrshang beh ïa ka thong, ka Donkin ka la shah pynkut noh da kaba ïoh tang 140 run khlem pyndep pura ïa ka 42 over bad khyllem lut baroh 10 wiket tang ha ka 26.2 over. Na ka liang jong u Wallam John Kynshi u la ïoh 33 ron na ki 32 bol, nangta u Rohit Rai u la tied 24 run na ki 18 bol.
Ha ka liang ki ‘rang kawang bol, u Riboklang u la shim 3 wiket/30 run na ki 5.2 over, katba u Aaron Nongrum u la shim 2wiket /33run na ki 7 over, kaba la pynthikna ïa ka Langsning ban jop suk da 124 ron. U Mrinal Das uba la khyrwit palat ïa ka spah ron u la ïohpdiang ïa ka nam ‘Man of the Match’.
