Shillong, Rymphang 16
U dkhot ka Ïingdorbar Thawaiñ sha Lok Sabha uba dei ruh nongïalam ka Congress, Saleng A Sangma, ha ka 15 tarik u Rymphang u la hiar sha ka shnong Umkhabaw kaba dei ka shnong kaba bun ki ba shong basah da ki jaidbynriew Garo ban pan ka jingkyrshan na ka bynta u kyrtong ka seng u ban ïakhun na Shella Constituency u Bah Astarland Khyllep.
Ïa u Saleng A Sangma la synran lang da ka Working President ka Meghalaya Pradesh Congress Committee (MPCC) ka Deborah Marak, ha ryngkat u
kyrtong ka seng u Bah Astarland Khyllep bad kiwei-kiwei pat ki nongïalam ba hakhmat ka seng.
Haba ai jingkren ha kane ka jingïalang na ka liang u Saleng u la ong ba ki nongïalam ka NPP bad kiwei-kiwei pat ki seng ki pynïakhun da ki kyrtong ki bym dei napoh kane ka konstit- wensi, hynrei ka Cong-ress ka wanrah da u kyrtong uba dei napoh ka shnong Shella. U la ong ruh ba lada ki paidbah ki ai ka jingjop ïa u kyrtong ka seng na ka liang ka seng kan ai ka jingïarap khlem da ieh beiñ la ki dei ki Khasi, Garo ne kiwei kiwei pat.
U Saleng u la pan ka jingkyrshan na ki paidbah ka Shella konstitwensi khamtam na ki nongshong shnong ka Umkhabaw ha ka ban pynjop ïa u kyrtong ka seng u Bah Astarland Khyllep.
Katba na ka liang u Bah Astarland Khyllep u la ong ba nga long uba la kloi ban ïeng, ban peit bad sngaplang ïa ki jingeh kiba ki paralok Garo kiba shong ba sah ha kane thaiñ bad ruh ban ïada ïa ki riti-dustur bad ïa ka khyndew ka shyiap.
“Nga dei tang ma nga u kyrtong ba mynta ha kane ka kynti uba tip ïa ki jingeh jong phi, nga sngewthuh shai kdar ruh ba dei tang ma nga ba lah ban weng ïa ki jingeh jong phi ba ïakynduh ha kane ka jaka” u la ong.
Ha kane ka jingïalang la ïoh ruh ka jingkren na ka Deborah Marak bad kiwei kiwei pat i nongïalam kiba la pan ka jingkyrshan na ki paidbah na ka bynta u kyrtong ka Congress u Bah Astarland Khyllep ha kane ka ilekshon MDC ka ban sa long ha ka 21 tarik mynta u bnai.
