Jowai, Rymphang 18
Shi bynta ka jingpynkhreh ïa ka ilekshon MDC sha JHADC, ki pulit jong ka West Jaiñtia Hills District ha ka 18 tarik Rymphang ki la shong jingïalang syllok ha ophis treikam jong u Superintendent of Police ka West Jaiñtia Hills District.
Hadien ka jingshong bishar ïa ki polling station ryngkat ka Election Cell kumjuh ki ophisar Sector bad ki Local Thana la lap ba 48 tylli ki Polling Station la buh kyrdan kum ki jaka thep vote kiba lah ban shah ktah.
Kum ki lad jingïada la pyntip ba la bthah ïa ki briew kiba don tiar siat ban leit buh ïa ki suloi ha ki pulit, la pynlong ruh ïa ka jingtalasi kali bad ka jingpahara nalor kiwei kiwei ki kam beaiñ.
Nalor ki pulit kiba don ha ki thanat bad outpost kiba dang peitngor ha la ki jong ki jong ki jaka, yn wanrah ruh palat 550 ngut ki pulit na ka bynta ban pyndep ïa ki kam ha ka por thep vote.
Yn buh shuh shuh ïa ki bor pahara ha ki Vulnerable Polling Station nalor ki Quick Response Team ïa kaba yn buh ha ki jaka ba donkam bha.
Ïa ka jinglong jingman baroh kawei la buddien bha bad haduh kine ki sngi ym shym la don kano-kano ka jingpynkheiñ ïa ka Model Code of Conduct bad ym pat don kano-kano ka Electoral Offence Case kaba la register.
La pynleit jingmut kyrpang ruh ha ki jaka khappud bad yn pynkhlaiñ ïa ka jingpynkhreh ïa ki bor pahara ha ka sngi thep vote.
La pynlong ruh ïa ka jingïalang hapdeng ki ar DC bad SP ban pynthikna ban ai ïa ki jingïarap pahara baroh katba lah kumjuh ka jingïatreilang kaba jan bad ki pulit jong ka West Karbi Anglong bad ki bor synshar district na ka bynta ban pynlong ïa ka ilekshon kaba ïaid beit ïaid ryntih bad kumba long mynta baroh ki jingïalap ilekshon ki long kiba ïaid beit ïaid ryntih.
