Shillong, Rymphang 16
U President ka National People’s Party (NPP) Meghalaya, Bah Prestone Tynsong uba dei ruh u Symbud Myntri Rang-bah ka jylla u la kular ban pynbeit noh ïa ka kam ba ïadei bad ka jingkhang tih maw tih shyiap ha Jylla ha ka jingïalap ilekshon kaba long ha Laitkroh ha ka sngi Saitjaiñ.
U la kyrpad ruh ïa ki paidbah ka Saitsohpen, Sohra ba kin pynkhreh ha ka ban pdiang ïa ki jingkyrkhu hadien ka ilekshon ADC haba kren ha ka jingïalang paidbah ha ka miet sngi Thoh-dieng.
Haba kyntu ïa ki paidbah ban kyrshan ïa u pyrsa trai jong u, Bah Rahboklang Tynsong, uba dei u kyrtong ka NPP na Lyngkyrdem-Laitkroh, u Bah Prestone u la ong, “Ngi kwah ban kyntiew ïa ka roi ka par ha baroh ki liang hapoh ka konstitwensi bad ka Jylla baroh kawei. Hadien ka 24 tarik Rymphang, ym tang ba phin ïoh ïa u MDC hynrei phin ïoh ruh ïa u Bah Prestone kum u kpa. Ngan ïai bteng ban don ryngkat bad phi bad nga kyrpad ïa phi ban ailad ïa u pyrsa jong nga ban long ka pyrnon hapdeng ka elaka jong phi bad ka ïing bad ka ophis jong nga ha Secretariat.”
“Khlem pep, ka jingkhang ban tih maw bad tih shyiap kala ktah bha ïa ka kamai jakpoh jong ki paidbah. Kumta, nga kyrpad ïa phi ban ap ïa ka por kaba biang bad nga kyrpad ba phin shaniah ïa nga, kum uwei uba ju dei u MLA jong phi (shuwa ka jingphiah konstitwensi) bad ruh ban shaniah ïa ka NPP kaba la ïalam ïa ka Sorkar, ba ngin pynurlong ïa ka jingangnud jong phi khnang ba ngin im ym ban ïap jingit. Nga kular ha phi ïa kane sha ki paidbah ka konstitwensi,” la kular u Bah Prestone.
U la kular ruh ban khmih ïa ka hukum ba dang shen ban khang ïa ka jingïakop dur masi bad ong, “Ha ka jingshisha, kam ju don ka jingïadur masi hynrei ki don ki seng ba na shabar, kiba la phah ïa ki dur ba don ka jingïakop ïadur masi sha Delhi bad ka Sorkar ka la phah ïa ka shithi ba pan ïa ka kaiphod halor ki sienjam ba la shim halor kane ka kam. Ngan sa ïakynduh ïa ki nongïalam hadien kane ka jingïalang ban ïakren ïa kane ka kam bad nga kyntu ïa phi ban nym pynlong ishu naba ngan shim ïa ka jingkitkhlieh ba pura ban pynbeit ïa kane ka kam”.
U la kyntu ruh ïa ki paidbah ba kim dei ban ngop ha ki jingpynbiej jong ki briew, kiba tbit ban kren tang ha ki surok bad ong, “Ngam kwah ban kren palat hynrei nga kyntu ïa phi ba sngewbha shaniah ha u Bah Prestone”.
Haba phai pat ha ka jingïalap ilekshon ha Saitsohpen, Sohra ha ka miet sngi Thohdieng, une u Nongïalam ka NPP u la ong, “Ngi la ïakynduh la saw sien ïa ki nongïalam jong ka Elaka ba la ïalam da u Sordar. Ngi tip bha ïa ki jingeh jong phi bad sngewsih bad haduh mynta ngim shym la lah ban shim ïa ka rai ba khatduh halor kane ka kam”.
“Ngam shym wan hangne ban pynbiej ïa ki paidbah namar ngi donkam ban shong sa shisien ka jingïalang ha shuwa ba ngin poi sha ka thong. Kane kam dei ka rynsan ba ngan ong ïa phi ba phin kynmaw ïa ngi halor ki kam ba bha jong ngi namar ngim donkam ban ong eiei hynrei ka jingshisha hi ka long ba ka jingeh ka la don la bun bun snem bad ym shym la don ba pynbeit ïa ki hynrei dei tang ka NPP kaba lah ban pynbeit noh shisyndon,” u la ong.
Haba kdew ïa kajuh ka jingshem jong ki paidbah ka Williamnagar haba ïadei bad ka jaka Sorkar, u Bah Prestone u la ong, “Ha u snem ba la leit, ka Kynhun Myntri jong ngi ka la ïakren ïa kane ka kam ba kumno ngin pynbeit ïa ka. Ka long kumjuh ha Williamnagar ha kaba ngi la lah ban pynbeit ïa ka. Namar ngim kwah ïa ka jingïasngewthuh bakla bad ba ki paidbah ka Williamnagar kin ym mad jingeh, kumta ngi la pynbeit ïa kane ka kam bad ki briew ka Williamnagar bad ki briew mynta ki la ong ba ka NPP ka dei shisha ka jingkyrkhu ïa ki”.
“Kumta, nga kular ïa phi ba hadien ka ilekshon MDC, ngan sa khot ïa ka jingïalang ban pynbeit ïa kane ka kam bad ngan sa wanrah ha ka jingïalang ka kynhun Myntri bad long kiba la khreh ban pdiang ïa ki jingkyrkhu,” u la ong.
Shuh shuh, u la kyntu ïa ki paidbah ka Sohra ba kin ai ka jingkyrshan ïa u kyrtong ka NPP bad u MDC barim Bah Donevan Wanlang ban wanrah ïa ka roi ka par ha baroh ki liang hapoh ka konstitwensi.
U la pyntip ba ki don katto-katne ki projek ba kongsan kin sa sdang noh shen hapoh ka thaiñ ki ban ai jingmyntoi ïa ki paidbah ka Saitsohpen bad ka Sohra.
