Nongstoiñ, Rymphang 16
U Deputy Commissioner (DC) ka West Khasi Hills, District, Bah Garod LNS Dykes, u la pyntip sha ki paidbah ba katkum ka jingmynjur da ka tnat District Council Affairs ka Jylla lyngba ka shithi kaba 14 tarik Rymphang 2025, la buh ïa ki bynta bapher-bapher ha ki Polling Station kiba la pynbeit bad la thaw ruh ïa ka Auxiliary Polling Station ha Marngor na ka bynta ka ilekshon MDC sha KHADC.
U Bah Garod u la ong ruh ba hapoh ka 27-Nongstoiñ District Council Constituency, ka 39-Marngor Polling Station ka kynthup lang ïa ka Marngor kaba don 539 ngut ki nongthep vote, Mawblei kaba don 225 ngut ki nongthep vote, Nongdom Laitmilang kaba don 280 ngut ki nongthep vote, Langlew kaba don 380 ngut ki nongthep vote, Mawkhan Pambeh kaba don 211 ngut ki nongthep vote, Lawnamlang kaba don 264 ngut ki nongthep vote, katba ka 40-Phyllut PS ka kynthup lang ïa ka Phyllut kaba don 172 ngut ki nongthep vote bad ka Mawkhan Wahkwang kaba don 161 ngut ki nongthep vote.
Shuh shuh, u la ong ruh ba ki nongshong shnong na kine jaka ki dei ban phikir bha ïa ki Polling Station la jong bad la pynbeit kumne khnang ba ka ilekshon KHADC kan ïaid beit ïaid ryntih.
