Shillong, Rymphang 16
U kyrtong shimet uba ïeng ha ka shap jong ka Sngi na Umroi Konsti-twensi, Bah George B Lyngdoh, u la ong ba um dei u shakri jong kino-kino ki seng saiñ-pyrthei (party) hynrei u dei u shakri jong ki paidbah.
U la ong ba wat wan wad shriew bhoi tang ha ka por ilekshon ïoh dait buit namar ynda la kut ka ilekshon dei ma u bad ki paidbah kiba hap shim jingkitkhlieh ïa ka konstitwensi.
Ïa kine ki kyntien u Bah George u la kren ha ka jingïalang ïalap ilekshon kaba la long ha shnong Mawbseiñ ha ka 14 tarik mynta u bnai ha ka por janmiet ha kaba palat spah ngut ki la wan ban sngap ïa ki nongrim ba u la pynshai.
U Bah George u la pynshai halor ka jingkynthoh kiwei ki nongïalam na kiwei ki seng ba ki kyrtong shimet ki dei ki myrsiang khlem tdong, u la ong ba u dei tang ma u marwei uba ïakhun kum u kyrtong shimet namar um kwah ban long shakri jong ki seng namar u dei u shakri paidbah.
U la ong ba don ki seng kiba kwah pynlong shakri ïa ki kyrtong hynrei ma u pat u dei u shakri jong ki paidbah namar ïa u la hikai naduh u kpa Bah EK Mawlong (bam kwai ha dwar U Blei) ban long u briew uba shlur ban ïeng ha dorbar ban khyrwit beit ïa kiba leh tam.
“Ngam dei uba pyndem tdong, hynrei ïoh don kita ki myrsiang khlem tdong ki don ha konstitwensi jong phi, namar hangne ha Umroi ngin ïakhun pyrshah ïa ka spah bad ngin ïai ïakhun,” u la ong.
U la pynshai ruh ba ka jingïakhun ka jong u kum u kyrtong shimet ban jied ïa ka shap jong ka sngi ka long ban phai biang ïa ka jingim jong u kpa Bah EK Mawlong uba la jop nyngkong ïa ka ilekshon MDC kum u kyrtong shimet ha ka shap jong ka sngi ha u snem 1972.
Ha kane ka sngi wat la ka suiñbneng ka long kaba khriat hynrei ki paidbah ki khlem khih satia hynrei ban sngap ïa ki kyntien u Bah George ryngkat ka jingthap kti haba u kren ïa ki jingshisha. Ynda la kut ka jingïalang ki paidbah ki la leit khublei kti ïa u bad kitbok ba un poi sha ka thong haba u ïakhun ïa ka ilekshon MDC.
