New Delhi, Rymphang:
Ki pulit jong ka Delhi, ki la sdang ban tohkit halor ka jingjia jong ka jingïaïuh para briew ha ka jaka sangeh rel ha New Delhi.
Ki pulit ki la ong ba kin sa bishar bniah ïa ki dur CCTV ban lap ïa ki jingshisha bad ka jing-sdang jong ka jingjia kiba la pynlong ïa ka jingkulmar bad ka jingïaïih para briew.
Uwei u heh pulit u la pynthikna ba ka jingtohkit ka la sdang hadien ka jingïap jong 18 ngut ki briew.
Kane ka jingjia ka la jia ha ka por ba ki paidbah kiba bun bha ki la ïalum ban kiew rel na ka bynta ka Maha Kumbh Mela kaba dang ïaid shakhmat ha Prayagraj jong ka Uttar Pradesh kaba dei kawei na ki jinglehniam ba heh tam ha ka pyrthei.
Ki pulit jong ka Delhi, ha ka Sngi U Blei, ki la sdang ban tohkit halor ka jingjia ha New Delhi Railway Station, da kaba ong ba yn bishar lyngba ka jingkhmih bniah ha ki dur CCTV ban lap ïa ki daw kiba la ïalam shaduh u pud jong ka jingïap bad ka jingmynsaw jong ki riewngeit, la ïathuh ka tyllong khubor.
Ka Indian Railways, ka la pynbna ban siew bai lutksan kaba T.10 lak, na ka bynta ki bahaïing jong kito kiba la duh noh ïa la ka jong ka jingim, ha ka jingjia kaba sngewsih, la ong ka khubor.
Ka jingpyllait khubor ka iathuh ba yn ai T.2.5 lak ïa kiba mynsaw jur bad T.1 lak ïa kiba mynsaw malu mala.
Ka Myntri Rangbah ba peit ïa ka Delhi, ka Atishi, ka la pynthikna ïa ka jingïap jong kine ki briew bad ka la pynpaw ïa ka jingsngewlem sha ki bahaïing hasem jong kiba la khlad noh.
Kane ka nongïalam ka AAP, ka la leit jngoh ïa ka LNJP Hospital, ha kaba kitei ki lanot ki shah sumar, ban kyrshan ïa ki bahaïing jong ki, kiba la shah ktah ha katei ka jingjia ba sngewsih.
“Ki 15 ngut ki briew kynthup 3 ngut ki khynnah ki la duh noh ïa la ka jong ka jingim; 10 ngut kiwei pat ki dang mynsaw ha kane ka jingjia kaba la jia ha ka jaka sangeh rel ha New Delhi,” ong u Chief Casualty Medical Officer ka LNJP hospital ha ka sngi saitjaiñ.
U LG ka Delhi u VK Saxena u la leit jngoh ruh ïa kiba mynsaw ha LNJP Hospital ha ka sngi Saitjaiñ hadien ka jingjia bad bthah ïa ki heh sorkar ban pynthikna ïa ki lad ai jingïarap.
Ha ka jingthoh halor ka X, u la ong ba la bthah ïa u Chief Secretary bad u Police Commissioner ban pynïaid ïa ka jinglong jingman bad ban phah ïa ki nongïarap.
