Shillong, Rymphang 16
Ki pulit jong ka thanat Sadar ki la ïoh ban kem noh ïa ki 3 ngut snar nongtuh arshaka katba ki dang thmu ban rong tuh ïa kawei ka arshaka (scooty) ha ka step jong ka sngi Saitjaiñ na ki bynta jong ka nongbah Shillong.
Kane jingïoh kem ïa kine briew ka la long hadien ba na ka liang jong ki pulit ki la pynjur ïa ka jingïaid pahara ha nongbah bad dei ha ka por kumba 4:50 baje mynstep, katba ki dang ïaid pahara na thanat Sadar, ki la ïakynduh ïa lai ngut ki briew kiba wan da kawei ka tourist taxi (Swift) kaba don ïa u registration number ML04-C-7163 ha Keating Road bad pyrshang ban tuh ïa ka arshaka kaba don ïa u registration number ML05-AC-8352 da kaba ot ïa u waiar ban pynmeh ïa ka engine.
Ha ka kyrwoh khubor ba la pyllait da u Superintendent of Police (SP) ka East Khasi Hills District, Bah Vivek Syiem, u la ïathuh ba kane ka kynhun ki pulit ka la ïoh ban kem shuwa ïa u nongñiah jong katei ka kali ba la kyrteng u Ribellang Phyllei (25 snem) na Biar, Laskeiñ Block, West Jaiñtia Hills katba ar ngut kiwei pat ki la ïoh ban phet da kaba shim kabu ïa ka jingdum.
U SP u la ïathuh ba ki pulit kiba ap pahara ha Mawryngkneng ki la ïoh ban bat noh ïa ki arngut kiwei pat ha jaka talasi kali bad kine ki kyrteng u Empyrkhat Dhar (21 snem) na Saphai bad u Steven Syngkon (19 snem) na Iaw Thymme ha West Jaiñtia Hills. U ïathuh ba kine ar ngut ki dang thmu ban phet sha West Jaiñtia Hills.
Na kine ki briew ki pulit ki la ïoh ban kurup ar tylli ki helmet, ar tylli ki bilor ba pyndap da ka umphniang petrol, ar tylli ki screw driver, shi set ka spanner, kawei ka allen wrench, uwei u T- Hand Hex key, uwei u T- Handle Torx Key, ka pisa ba T.6100 bad lai tylli ki mobile phone.
Ha kaba ïadei bad kane, ki pulit ki la pynrung mukotduma ïa kine ki briew hapoh ka kyndon 305(b)/324(4)/111(2)(b)/3(5) jong ka BNS. Ka jingtohkit mynta ka la ïaid shakhmat ban lapdien ïa kiwei pat ki kam tuh thuk thuk.
