Jowai, Rymphang 16
U MP Rajya Sabha, Dr Wanwei Roy Kharlukhi, ha ka janmiet ka 15 tarik u la hiar ban leit ïalap ilekshon na ka bynta u kyrtong ka NPP na Jowai North, u Dr DI Kjam kaba la pynlong ha Ladthadlaboh.
Haba pan jingkyrshan ïa u kyrtong, u Dr. Khar-lukhi u la kynthoh tyngeh ïa ki seng saiñpyrthei kiba kwah ban pynduh pyndam ïa ki district council da kaba thmu ban wanrah ïa ka aiñ thymmai ka article 371.
U la pynpaw ïa ka jinglyngngoh ba don ki seng saiñpyrthei kiba kwah ban pynduh ïa ka district council bad buh jingkylli, hato ki bishni ïa ki shnong ki thaw ban ïoh ïa ka pisa lyngba ka ‘direct funding’?
Ha kaba ïadei bad ka ‘direct funding’, u la ong kane kan urlong noh shen bad ka shong ha ka parliament ynda ka la wanrah ban pynkylla ne amendment ïa ka Sixth Schedule, kane kan long kawei na ki aiñ ka ban wanrah jingmyntoi tam ïa ka council lyngba ka direct funding, ka pisa kan poi sha ki shnong na ka bynta kino kino ki kam pynroi pynpar.
U Dr. Kharlukhi u la kren ruh halor ka jingai jait kmie, da kaba pynksan ba ka kynthei ka dei hok ban ïoh ïa ka jait ka kynja, namar ba ka la aiti ïa ka jingim jong ka ban heh san ka jaidbynriew bad bynrap ba katne roi ka jaidbynriew ruh ka dei na ka jingïohi jngai ki longshuwa-manshuwa ban ai ïa ka jait ka kynja sha ka kynthei.
Kiwei kiwei kiba ai jingkren ha kane ka jingïalang ki kynthup ïa u MLA ka Jowai u Ma Wailadmiki Shylla, Ma Edystone Shylla nalor u kyrtong ka seng.
