Shillong, Rymphang 16
U kyrtong ka Congress na Malki-Laitumkhrah, Bah Manuel Badwar u la ther tyngeh ïa kito kiba kwah wanrah ïa ka ‘Article’ 371 bad ong ba kim dei ban ïalehkai bad ka ding ïoh ing pynban ïalade.
“Kaba tieng eh mynta ka long ba don ki seng kiba kren, ba ong ban pynduh syndon ïa ka District Council…kin wanrah noh da ka ‘Article’ 371 ba ki kwah palat. Nga ong wat pynbiej ïa u paidbah namar phim pat sngewthuh ïa ka ‘Article’ 371 ka dei kaei. Phi shu pynshongshit ha surok-syngkieñ, phi kren sharum-shaneng ban phin leh ïa kata, kan wanrah ka jingma – wat lehkai bad ka ding namar teng-teng phi lah ban ing ïalade,” ong u Bah Badwar haba ai jingkren ha ka jingïalang ïalap ilekshon ha ka Sngi Thohdieng ha Malki.
Haba kdew ba kata ka jinging ka lah ban ïalam pynban sha ka jinging jong ka jaidbynriew, une u kyrtong u la ong ba ka Khyrnit ba Hynriew ka dei kata kaba la tehlakam tikna ïa u Khasi bad ym don ba ïoh lad ban leh katba mon da kaba ai nuksa ba “ka khyndew jong ngi kan sah hi ka jong ngi” bad ym don mano-mano ruh ba lah ban pynkhih ïa kane.
Haba pynsngew ba ka bor jong ki Dorbar Shnong bad u nongshong shnong ka la nang tlot, u Bah Badwar u la ong ba ka District Council ka don ïa ki kyndon kiba lah ban pynkhlaiñ bad ban ai biang ka jingbishar kaba skhem jong ki Dorbar Shnong.
Halor ki samla kiba la nang la stad hynrei ki bym biang ka kam ka jam, u la ong, “Kane ka dei ka kamram jong ka District Council ban pynpher namar haduh mynta, ngi ai jingbit ïa ki karkhana bad kompeni bapher-bapher ban treikam ha ka khyndew jong ngi hynrei ngim ju ong ba phi dei ban ai kam ha ka rukom kaba kham sani.”
Haba pynpaw ba ki kam kiba kine ki karkhana bad kompeni bapher-bapher ki ai sha ki Khasi ki kut tang kam kiba rit kum ka kam ap khyrdop, kam ai sha bad kumta ter-ter, une u nongïalam u la ong ba kine ki kompeni ki dei ban pynrung ïa ki samla ha ki tnat treikam bapher-bapher kum ha ki ‘Sales and Marketing’, ‘HR’, ‘Research and Development’ bad kiwei-kiwei.
U Bah Badwar haba kren halor ka jingdkoh jong ka District Council, u la ong ba ka jingai bor ha ka Khyrnit ba Hynriew (kaba don kumba 27-28 sla) kam dei kaba duna, hynrei kaba khlaiñ.
“Lada ngi phai sha ka ‘Article’ 371 kumba ong ki briew ba pan shi pan – ka ‘Article’ 371 tang shi sla ruh kam don…to ong ma phi khlaiñ kaba 22 sla ne kaba tang 1 sla,” u la buh jingkylli.
Kumjuh haba kdew ba ka District Council ka kdup ïa baroh, une u kyrtong u la ong ba ka jingdkoh ka District Council kam dei ba dkoh ka aiñ, hynrei ba dkoh ki nongpynïaid.
“Lada man ka por phi ïoh ki nongpynïaid ba shu shong bad kbum bad ym kren eiei ban ïaleh ban kyntiew, te yn poi shano…ngi tlot namarba tlot ki nongpynïaid, ngi tlot namar ba la bun palat ki MDC kiba leit shong hangtei khlem da don ka jingmut ban treikam. Ngi donkam ïa ki briew kiba don ïa ka iktiar kiba lah ban treikam,” u la ong.
Haba pan jingkyrshan na ki paidbah ha kane ka ilekshon ban wan ha ryngkat ka kular ban pynpher ïa ka rukom treikam, u Bah Badwar u la kyrpad ïa ki paidbah ba haba ki leit thep ‘vote’ ha ka 21 tarik (Rymphang), kin ‘vote’ da ka jingsngewthuh.
Shuh shuh u la bynrap, “Lada ngi ïoh ban shakri ïa u paidbah, ngeit ïa nga, nga nym pher na ka jinglong u Kpa lajong. Ngan ym peit tang ïa uta uba thep ïa nga, ïa u bym thep ruh ngan peit kumjuh da kajuh ka khmat namar u dei u paid jong ngi.”
