Bengaluru, Rymphang:
Haba pynpaw ba ka jinglong nongïalam jong u Myntri Rangbah u Siddaramaiah kan long kaba kongsan haduh katta katta na ka bynta ka Congress ban jop ha ka ilekshon sha ka ïingdorbar thawaiñ jong u snem 2028, u Myntri ka tnat PWD u Satish Jarkiholi ha kine ki khyndiat sngi ba la leit, u la ong ba u Myntri Rangbah ka jylla u dei ban don ha ka saiñ pyrthei kaba treikam ha ka jylla na ka bynta kawei pat ka samoi (jingthep vote hadien u snem 2028).
Haba kren sha ki lad pathai khubor ha Bengaluru, u la ong ba ka Congress ka donkam ïa u Siddaramaiah ha kano-kano ka khep. “U la pyndep hok kum u Myntri Rangbah. U dei ban trei na ka bynta ka jingroi jong ka seng wat hadien ba u la pyndep ïa ka por kum u Myntri Rangbah. Baroh ha ka seng ngi donkam ïa ka jinglong nongïalam jong u ha ka jylla ban ïakynduh ïa ki jingeh ki ban sa wan ha ka saiñ pyrthei. Ka la kylla long kaba ym lah ban kiar ïa ka Congress ban don ïa u ha ka seng tad haduh ban da mih ka kynhun nongïalam kaba pher” u la ong.
Haba kylli halor ka jingkynthoh jong u halor ka jinglah ban kylla Myntri Rangbah ka jylla ha ka phang pdeng jong ka jingïateh hapdeng u Siddaramaiah bad u Symbud Myntri Rangbah u DK Shivakumar, u Jarkiholi u la ong ba ki lad pathai khubor ki dei ban buh ïa kane ka jingkylli sha u President ka AICC u Mallikarjun Kharge bad u General Secretary u Randeep Singh Surjewala. U la ong ba um tip ïa ka jinglong jong ka seng halor katei ka mat.
“Ngam tip la ka don ne em ka jingïateh kular ban ïasam bor hapdeng kino-kino ki nongïalam bad ngam don jingmut ruh la u Siddaramaiah hi un dang bteng ne em kum u Myntri Rangbah,” u la bynrap. Halor ki khubor ba ka Congress kan bujli ïa u Shivakumar kum u President ka KPCC, u Jarkiholi u la ong ba um tip ïa kane bad hap ban ap bad peit la kan don ne em ka jingkylla hapoh ka seng ha ka jylla. U la ong ba ym don uwei ruh na ki nongïalam ka Congress uba pyrshah ïa ka jingïeng jong ka seng ha kino kino ki mat. Ki nongïalam ki dawa tang ïa ka hok jong ki, kaba lah ban ïohi kum ka jingleh pyrshah seng, u la ong.
“Ngi laitluid ban pynpaw ïa ki jingmut jong ngi hakhmat ki nongïalam jong ka seng. Ngi la dep ïathuh ïa kane sha ki nongïalam ka seng. Ym don mano-mano ha ka seng kiba pyrshah ïa uno-uno u nongïalam bahakhliehduh. Baroh ngi ïatylli ha ka Congress jong ka jylla,” u la pynshai.
