Babu Kular Khongjirem
Katba nangjan ka ilekshon MDC, katta nang shongshit bad nangkylla ka jingmut jingpyrkhat jong ki paidbah. Ki paidbah ki la sngap bha ïa ka jingkren jong ki nongïa-lam ki seng bapher bapher bad ka sur ki nongkyrshan na manla ki konstitwensi.
Ha ka por ilekshon MP, ym long ïakren shuh ïa ka lyer langthari jong u Prah. Ka jingkhmih lynti ki nongïalam Prah mynta ka long, ba, kajuh ka lyer (waves) kan sar naphang lin manla ki MDC konstitwensi ha kylleng ka ri Khasi-Jaiñtia. Hynrei, imat, kane kam lah shuh satia ban jia ha kane ka samoi ilekshon MDC. Imat, ka lyer ba beh ha ka aïom pyrem, ka ïapher na ka lyer ba beh ha ka por lyiur, por synrai bad por tlang bad kumta ter ter.
Ka jingjop kput ka seng Prah ha ka ilekshon MP na Shillong Parlia-mentary Constituency ka la pynlong ïa ki nongïa-lam jong katei ka seng ba kin sngew sarong, sngew khyllew, sngew meng bad ban nym kheiñ briew shuh ïano-ïano ruh. La i kumba ka dei pynban ka Very Proud People (VPP) lane kata ka Very Powerful Party (VPP). Ka jingsngew stad hangamei, ka jing ak tip lut nanglut bad stad lut jong ki, la kum kita ki “I Specialists”. La i kumba, lada kren kiwei ïa ki ym long, hynrei lada kren ma ki pat, ki kren katba mon la kum kiwei ki dei tang kum ki ñiut ki ñier, ki puit ki khñiang. Ki ak la kumba ym don shuh kiba kham stad bad kham palat ka jingshemphang jong ki (more supreme) ïa baroh kiba stad ha kane ka pyrthei stad mynta. La i kum ka kynhun Voice of Powerful People (VPP) ne ka Voice of Proud People (VPP) pynban. Ka jingmaham ka ktien ki riewstad ka long ba ka jingsarong ka wan ha shwa ka jingjot (pride goes before destruction). Ka jingsngew stad palat ruh ka pynisih ïa ki ‘riew shisha bad ‘riew pyrkhat pyrdaiñ (like minded people).
Ha ka jingshisha, shisien ba la ïoh ïa ka jingieit bad jingshaniah na ki paidbah, dei ban don shuh shuh ka jingsngewrit bad ka akor ka burom namar dei ka jinglehrit ne sngewrit kynthop ha ryngkat ka akor ka burom u briew kaba thaw pyrthei bad saiñdur ïa ka longbriew manbriew wat haduh ka synshar khadar ruh.
Ngi ïohi lyngba ki lad pathai khubor (social media) ba ki konstitwensi Prah na Mawlai ka don jingma ha ki kyrtong shimet. Ka Headquarter u Prah na Nongkrem ruh, la i triem bad i shyrkhei shibun ka jingïaleh bad u kyrtong shimet hi. Na ka konstitwensi Prah jong ka Mawryngkneng/Sohryngkham ruh ka bym i thikna shuh. Ynnai ïakren ïa ka konstitwensi Prah na North Shillong (Jaïaw bad Mawkhar) kaba ka jingïa pyni nia ka jur bha, mano ba dei bad ba lait kaba la pynkulmar jingmut (confused) ïa ki paidbah ba lui-lui bapli (innocent people). Tangba, lada jia ba ki Prah ki rem shisha na kitei ki saw (4) tylli ki konstitwensi ba ki jop ha ka ilekshon MLA 2023, kata, ki la duh jingshaniah na ki paidbah, sa tang ha ki konstitwensi thymmai ki lah ban jop namar “Tang kiba la phong ïa ka juti, ki sngewthuh ba thar u prek”. Lada u Prah um ïoh majority ne jingbun paid shisha ban thaw ïa ka EC ha KHADC ne JHADC, ki la dei ban pyrkhat janai bha (post mortem) ne wad bha ïa ki daw bah daw san (re-retrospective) khnang ba kin ïoh biang ka jingieit bad ka jingshaniah na ki paidbah kylleng ka ri Khasi-Jaiñtia jong ngi ha ka ilekshon MLA ka ban long ha u snem 2028.
