Shillong, Rymphang 19
Ka Garoland State Movement Committee (GSMC) ka la pynpaw ïa ka jingpyrshah jur halor ka jingïoh bhah ka Esther Ngurlienmoni Marak ha ka ‘Garo Quota’ jong ka risol Meghalaya Civil Service (MCS).
“Nga thoh ïa kane ka shithi na ka liang ka GSMC, Tura, ban pynpaw ïa ka jingpyrshah jur halor ka jingshah thung ka Esther Ngurlienmoni Marak, kaba la ïoh ïa ka Serial No.25 ha ka ‘Garo Quota’ katkum ka jingpynbna MPSC/EX-C/50/2021-2022/171,” ong ki nongïalam ka GSMC ha ka shithi sha u Chief Secretary ka Jylla, Bah D.P. Wahlang.
“Ka jingkyrpad ka wan sha ka jingtip jong ngi ba ïa ka jingujor ha kaba ïadei bad kane ka kam, la dep ujor teng da u nongtrei mon sngewbha ka imlang-sahlang, u Cherian G. Momin sha ka ophis jong phi. Hynrei haduh mynta ym pat shym la ïohi kano-kano ka sienjam ne wat ka jubab kaba la ïohpdiang halor kane ka kam. Kane ka la pynmih ïa ka jingsngewkhia kaba jur hapdeng ki dkhot jong ka komiti bad ki paidbah Garo babun balang, khamtam ha kaba ïadei bad ka jinglong hok bad jingbym shah liang jong ka jinglong-jingman ka eksamin,” ki la ong.
Haba kdew ba na ka por sha ka por ka seng ka ju ban jur halor ka jingdonkam ban pynneh-pynsah ïa ka jinglong kyntang jong ka rukom bhah kam ha ka Jylla, ki nongïalam ki la ong ba ïa ki jingbhah kam la shna kum ka lad ban kyntiew ïa ki jaidbynriew ba shah iehnoh beiñ bad ban pynbiang sha ki ïa ka lad kaba mar katjuh ha ki kam shakri hapoh ka Jylla. Kumta ka long kaba donkam eh ba ïa kine ki bhah dei ban pyndap da ki kyrtong kiba dei hok shisha na kita ki jaidbynriew.
“Ka jingpyrshah jur jong ngi haba ïadei bad ka jingpynrung ïa ka Esther Ngurlienmoni Marak ha ka ‘Garo Quota’ ka mih na ka jingngeit ba ka jingthung ïa ka, ka pyntlot ïa ka jingthmu jong kane ka rukom bhah kam. La ngeit paidbah ba ka Marak kam dei ka nongmihkhmat jong ka jaidbynriew Garo. Ka jingmut jong kane ka rukom ai bhah ka long ban pyntikna ba kan ai jingmyntoi ïa kito kiba dei shisha na ki jaidbynriew trai-ri jong ka Jylla,” ki la ong.
“Ka jingailad ïa ki ‘riewshimet ki bym dei shisha na kine ki jaidbynriew ban ïoh jingmyntoi na kine ki ‘Quota’ ka long ka jingshet kylla ïa ki paidbah ha kaba ïa kane ka jingbhah la shna ban kyrshan,” la ong ki nongïalam ka GSMC.
Ka seng ka kyntu ruh ïa ka shlem treikam u CS ban bishar bniah halor ki jinglong-jingman kiba ïadei bad ka jingthung ïa ka Marak kumjuh ban bishar bniah ïa ki jingpynshisha bad ki jingkam ba ka la pynpaw ha kaba ïadei bad ka jingdei hok jong ka ban ïoh ïa ka ‘Garo Quota’.
Kane ka kam ka la pynmih ïa ka jingbym sngewhun kaba jur hapoh ka imlang-sahlang jong ngi, bad ka jingbym leh eiei ha ka por kaba biang bad kaba shai halor kane ka mat ka la pynsniew shuh-shuh ïa ka jinglong-jingman, ong ka seng
“Ngi kyrpad ïa phi ban tohkit bniah halor kane ka kam bad ban shim ïa ki sienjam katkum ka aiñ, lada lap ba la pynkheiñ ïa kino-kino ki kyndon ha ka jingpyntreikam. Ngi ngeit ba khlem da leh eiei noh kloi, kane ka mat kan nang jur shuh-shuh bad kan nang pynsniew ïa ka jingshaniah hapdeng ki jaidbynriew Garo bad ka bor synshar Jylla,” ki la ong. Shuh shuh ki la bynrap ba lada ym leh eiei ban pynbeit ïa kane ka bynta, kata kim banse ban wad da kiwei pat ki lad, kynthup-hynrei ym tang ïa ki jingleh lyngba ka aiñ, ki jingïakhih, ban wanrah ïa ka jingpynleit jingmut ïa kane ka mat kaba khia.
“Ka jaidbynriew Garo kan ym sngap jar ïa kum kane ka jingshah leh bym hok, bad ngi long la khreh ban shim ïa ki sienjam baroh ban pyntikna ba ki dkhot kiba dei hok jong ka jaidbynriew jong ngi kin ioh jingmyntoi na ki jingdon-jingem bad ki kabu kiba dei hok jong ki,” ki la ong.
