Ka bam ka sa, ka um bam um dih bad kiwei kiwei ki bym dei ban duh ha ka jingim jongngi ki briew. Kata ka ja ka doh, ka dohkha ka sha ka dud bad ki jingbam kum ki ruti, ki biskit bad kiwei kiwei kiba ngi dei ban ïoh man ka sngi. Nalor kine sa ki soh ki pai, ki riewmadan, ki phan, ki shriew, ki jhur ki jhep ba la phew jait ki donkam ban ïoh ban bam ha ka jingim jongngi ki briew. Ha ka jingim jongngi ki briew ngi donkam da kiwei pat ki bym dei ban bam kum ki Kali, ki Television, ki Mobile, ki Computer kiba ngi donkam ban ïoh jingmyntoi ban tip ïa ka jinglong jingman jong kiwei ki para briew ba shong ba sah sha kiwei ki jaka kiba jngai na kaba ngi shong.
Nangta sa ki sopti phong, ki jaiñ ki nep ban kup ban sem ban ïada pynsngaid ïa ka met ka phad na ka jingkhriat bad jingshit jong ka Mei mariang. Kum ki briew ngim lah ban duh ïa ka bam ka sa bad ïa ka um bam umdih. Hooid ki don kiwei kiba ngi dei ban ïoh kum ka pule ka puthi, ka thoh ka tar bad ka akor khnang ban tip ïa u Blei nongthaw nongpynlong ïa ngi ki briew. Nalor kitei haneng ngi im ha kane ka sla pyrthei ban ïarap pynbha ïa ka imlang ka sahlang para briew bad ym dei ban im tang ïalade khlem da peit da ïa kiwei ki jingthaw ba im ha kane ka sla pyrthei. Ki jingthaw ba im kum ki mrad ki mreng, ki shrieh ki tngaw, ki Hati, ki Sier ki Skei, ki khia ki dohkha, ki sim ki doh ba lai phew jait kum ki Lyngdikur, ki paitpuraw, ki Syiar, ki Han ki Jalyeit, ki khlieng, ki tngab, ki para, ki Moina, bad shibun ki jait sim bad ki mrad ba don hangne ha sla pyrthei, ngi dei ban ïada bad ban ri ban sumar ïa ki. Ka jingim jongngi ki briew hangne ha sla pyrthei kaba kongsan eh ka long ban kamai ïa ka hok kumba u Blei u la thaw ïa kiei kiei baroh hangne ha sla khyndew bad hapoh duriaw. Ka um ka dei kaba ha khmat eh bad ki jingbam kiba kongsan eh ba ngi dei ban ïoh hangne ha sla pyrthei, lym kumta la troiñ ka jingim kumba jlop bad hap neh ki sla dieng ha ka por pyrem. Kloi kloi kiba don ha sla pyrthei ki long ka jingmyntoi ïa ngi ki briew.
C. B. Iawphniaw
