Shillong, Rymphang 17
U MDC ka Mawphlang-Diengïei konstitwensi u ban ïakhun biang ïa kane ilekshon MDC kum u kyrtong jong ka seng National People’s Party (NPP), Bah Lamphrang Blah, u la ong ba kum u MDC ba la shah jied haduh saw sien u la pyndep ïa ka kamram da kaba trei shitom hapoh KHADC ban wanrah ïa ki aiñ bad kumjuh hapoh ka konstitwensi na ka bynta ki kam pynroi.
Haba pan biang ïa ka jingkyrshan ha kane ka kynti ha ka jingïalang kaba la long ha Mawngap ha ka Lah Sngi U Blei, u Bah Blah u la ong ba um kwah ban kynthoh ïano-ïano ha kane ka ilekshon, hynrei u tyrwa sha ki paidbah ba kin jied biang ïa u namar ba kum u MDC u khlem leit ban shu shong ha KHADC.
“Phi la kyrshan ïa nga mynta la saw sien ban long u MDC, khublei shibun. Nga la trei hok ïa ka kamram hapoh ka district council kaba dei ban ïada ïa ka hok ka jong ngi kaba ngi la ïoh na ka Riti Synshar ka Ri. Kum u MDC nga la trei shisha ban ïada bad pynskhem ïa ki hok jong ngi”, u la ong.
U la ïathuh ba ka la don ka jingthmu ban pynduh noh ïa ka iktiar ki rangbah shnong, hynrei ka district council ha ka por ba u long MDC u la ïakhun. U la ong shuh shuh ba hapdeng ka jinglong MDC u la pyrshang ha ka bor kaba rit ban ïarap ïa ki paidbah ka konstitwensi ha ka por ba ki donkam.
“Lehse, ki don ki bynta ba ngam shym la lah ban pynsngewtynnat bad pynhun ïa phi, sngewbha phin ym ïathew”, la ong u Bah Blah.
“Ngi don hynriew ngut, ngam don eiei ban kynthoh ïa kiwei ki kyrtong kiba ïaleh pyrshah. Klet shwa ïa ki phai sha nga bad ailad ïa nga ha kane ka kynti kaba mynta. Nga don hangtei (KHADC) ngam shym la pynlehnohei ïa ka por, nga la ïoh ban bat ïa ka shuki Chairman bad ngi la ïoh ban shna ïa ki aiñ kaba la ïoh muhor na u Lat ka Jylla”, la ong u Bah Lamphrang Blah.
