Shillong, Rymphang 17
Ka lama jong ka ri India kam shym la paw ha National Stadium jong ka Pakistan na ka bynta ka jingïashim bynta ha ka ICC Champions Trophy.
Kane ka la paw lyngba ka jingsaphriang ka dur khih ha ki rynsan social media lyngba ka jingring dur da ki ‘riew ïeid ïa ki jingïalehkai kriket kiba don ha ka nongbah Karachi. Ka jingbym paw jong ka lama India ha katei ka lympung ïalehkai Champions Trophy ka la pynkyndit ïa ki katto-katne ngut ki nongkyrshan bad ka la pynmih ïa ka jingïakren kaba jur bha ha ki social media. Ki nongkyrshan ki la shu tharai ba ka daw ka lah ban don jingïadei bad ka jingshisha ba ka kynhun ïalehkai jong ka India ka ïalehkai ïa baroh ki jingïalehkai Champions Trophy jong ka ha Dubai.
Ïa ka Karachi Stadium la thmu ban pynlong ïa ki jingïalehkai na ka bynta ka New Zealand, South Africa, Afghanistan, Pakistan bad ka England. Tang katto katne sngi shwa ban sdang katei ka jingïalehkai, ka la mih ka durkhih na katei ka jaka ha kaba lah ban ïohi ïa ki lama jong ki ri kiba ïashim bynta, kaba la pynlong ïa ki nongkyrshan ban lyngngoh balei la pyntreikam ïa kum kane ka jingleh jong ka Pakistan Cricket Board (PCB).
Lah ban kdew ba na ka liang ka kynhun ïalehkai ka India ka la kyntait ban leit sha Pakistan na ka bynta ka Champions Trophy. Dei halor kane ka daw kaba la pynbor ïa ka Pakistan Cricket Board bad ka International Cricket Council ban pynkylla ïa kane ka lympung sha kawei pat ka rukom.
Kum shi bynta jong ka jingïapynbeit, ka India kan ïakhun ïa baroh ki jingïalehkai jong ka ha Dubai, kynthup ïa ka semi-final bad final, lada ka kynhun kan ïoh rung. Kum shi bynta jong ka jingïapynbeit kaba la ïasoi, kaba kynthup ïa ka BCCI, PCB bad ICC, ka kynhun kriket jong ka Pakistan ruh kan nym ïalehkai ïa ki jingïalehkai jong ka ha ki jingïalehkai ICC ba ka India kan pynlong ha ki snem ban wan.
