Nongpoh, Rymphang 17
Uwei na ki rangbah uba la wan sha ka jingïalang ïalap ilekshon jong ka synjuk ki san shnong ha ka shnong Liarsluid, u la sei bad thad madan ïa ka kam thaw jingkulmar jong u MDC ka Umroi, Bah Rangkynsai Kharbuki, uba donkti ban weng ïa u Rangbah Shnong ka Nongrim Nongladaw uba la jied da ki paidbah ha ki snem jong ka jingwan lynshop ka khlam Covid-19.
Utei u rangbah, u la sei bad thad madan ïa ka phone call recording kaba la ïakren da ki nongïalam shnong bad u Syiem ka Hima Mylliem, ha kaba la ïohsngew ba u Syiem ka Hima Mylliem u la jubab ba ka dei ka jingpynbor jong u Bah Rangkynsai Kharbuki, MDC ka Umroi ban phah weng ïa ka jinglong Rangbah Shnong jong uwei u rangbah bad ban thung pat da u Acting Rangbah Shnong uba ki paidbah ki khlem jied satia.
Kane ka dei ruh kawei na ki bynta ba u MLA barim ka Umroi, Bah George B Lyngdoh u la dep ban kren ha kane ka jingïalang kaba na ka liang u Bah Rangkynsai Kharbuki u la kam ba ka KHADC ka don bynta ban tuklar ïa ki kam shnong lait sa tang da don ki jingujor. Hynrei ha shwa ba ki paidbah kin ïoh ban kylli jingkylli bad thad madan markhmat, u Bah Rangkynsai Kharbuki u la mih noh na katei ka jingïalap ilekshon da kaba aidaw ba u la dep ïakut jingïalang shawei pat.
Kane ka jingthad madan utei u rangbah lyngba ka recording call, ka la pynshai ïa ki paidbah ba wat lada u Bah Rangkynsai Kharbuki, u len bad kyntait, hynrei ka jingshisha ka dei ba u la don bynta ban wanrah jingkulmar ha ka kam shnong kam thaw, ha ka jaka ba un pynlong tylli bad pynkhlaiñ ïa ki nongialam shnong kiba la jied da ki paidbah.
