Shillong, Rymphang 17
U President ka National People’s Party (NPP), Conrad K. Sangma ha ka Lah Sngi U Blei u la hiar sha khappud India-Bangladesh ban ïalap na ka bynta ka ilekshon MDC sha KHADC, ha kaba u la ong ba u MDC ym dei tang ba u mihkhmat ïa ki paidbah sha district council, hynrei un lah ban pyndon ka jingïadei kaba jan hapdeng ki paidbah bad ka Sorkar.
U Conrad u la hiar sha ka shnong Dalia kaba hap hapoh ka Shella konstitwensi ban pan jingkyrshan na ka bynta u kyrtong ka NPP, Bah Ethan Kharpuri.
Haba kren ha katei ka jingïalang u Nongïalam ba ha khliehduh ka NPP u la ong ba ki paidbah kiba shong ba sah ha khappud India-Bangladesh ki ïakynduh bun ki jingeh, bad dei tang u Nongïalam ba tbit uba lah ban leh eiei ïa ki jingeh jong ki paidbah.
“Ka ilekshon KHADC ka plie lad na ka bynta ki paidbah ka Shella konstitwensi ban jied ïa u Nongïalam uba lah ban shakri kum ka sur jong ki paidbah bad u ban long kum ka jingkieng hapdeng ki paidbah bad ka Sorkar. U MDC un ym dei tang ban mihkhmat ïa ki paidbah ka Shella konstitwensi sha district council, hynrei un lah ban pynjan ka jingïadei hapdeng ki paidbah bad ka Sorkar”, la ong u Conrad uba dei ha kajuh ka por u Myntri Rangbah ka Jylla.
Haba pan jingkyrshan na ka bynta u Bah Ethan Kharpuri, u Nongïalam ka NPP u la ong, ban pynbeit ïa ki jingeh donkam ïa u Nongïalam uba bha, uba lah ban sngewthuh ïa ki jingeh bad uba lah ruh ban weng ïa kita ki jingeh.
U Conrad ha kane ka sngi u la pynkynmaw ruh ïa ka kular ba u la khlei ha ka ilekshon ba la dep ban pynïasoh da ka surok na Shella sha Sohra kaba lah ban shan ha ki aïom bapher-bapher, ïa kaba mynta la lah ban pyndep. Ha kane ka jingïalap ilekshon u la jer ruh ïa ki jingïarap bapher-bapher ba ka Sorkar ka la leh na ka bynta ka jingmyntoi ki paidbah ka Shella konstitwensi bad kumjuh ha kiwei ki jaka khappud ka Jylla Meghalaya.
“Ka NPP ka ngeit ha ka jingkynthup lang ïa baroh ha ki kam pynroi. Ngi la shim ïa ka jingkitkhlieh ïa ki paidbah jong kane ka Jylla ban wanrah ïa ki prokram kiba ai jingmyntoi ban pynthikna ïa ki kam pynroi na ka bynta baroh ki jaidbynriew. Ka jingkiew jong ka Jylla ka shong ha ka bit ka biang jong ki paidbah, ngi ngeit ha ki paidbah jong ngi bad ngi don ban pynbeit ïa ki jingdonkam jong ki, la ka long ha ka pule-puthi, ki jaka sumar lane ban wanrah ïa ki jingtei kiba dei ki kam pynroi”, la ong u Conrad.
U la ong ba ka NPP ka buh hakhmat eh ïa ka thong ban kyntiew ïa ki nongrep bad ban plie lad na ka bynta ki samla bad ki kynthei bad kumjuh na ka bynta ban tei ïa ka Jylla baroh kawei. Haba kren halor ka jingeh ban ïoh ïa ki EPIC, khamtam ïa ki nongshong shnong ha khappud, u la ong ba ka Sorkar bad ïalam da ka NPP ka la dep pynbeit ïa kane ka phang.
“Ngi ngeit ba ki briew jong ngi, la ki shong ki sah shano-shano ruh ki dei ban ïoh ïa ka hok bad ka bhah ba la pynkhamti jong ka ri”, la ong u Conrad.
Haba kren pat halor ka jingshah kynnoh na ki liang pyrshah, u Myntri Rangbah u la ong ba wat la ki pyrshah, hynrei ki donkam pat ïa ka jingtuklar jong ka Sorkar ba ïalam da ka NPP ha kaba ïadei bad ka kam pynroi kumjuh ban weng ïa ki jingeh jong ki.
“Wat ym sheptieng ïa ki seng saiñpyrthei kiba kren pyrshah ïa ngi. Ngi don ha ka Sorkar, hadien ka ilekshon baroh ki seng kin hap ban shaniah ha ka NPP ban pynbit pynbiang ïa ki jingdonkam jong ki. Jubab ïa ki da ki vote jong phi bad pyntip sha ki ba ngim shah ïalam bakla da ka jingkren jong ki”, la ong u Conrad.
