Hyderabad, Rymphang:
Hadien ka jingïakren kaba markylliang bad u Rahul Gandhi u nongïalam ka seng Congress ha Delhi ha kine ki khyndiat sngi ba la leit, u Myntri Rangbah ka jylla Telangana u Revanth Reddy u la wad ban pynduh ïa ki khubor hamsaïa ba ka don ka jingïapher hapdeng jong ki, da kaba pynskhem ba kam don “ka jingïapher” kumba la pynpaw shwa.
Ka jingïakren kaba la khmih lynti bha, kaba la wan hadien bun bnai jong ka jingpyrkhat halor ka jingïadei hapdeng u Revanth bad u Rahul, ka la ïohi ïa u Myntri Rangbah ba u la kyntait beit ïa kano-kano ka jingmut jong ka jingbym ïasngewthuh jingmut, da kaba ai kyrteng ïa kum kine ki khubor tang ki “jingkynthoh”.
Haba kren bad ki nongthoh khubor ha ka jingïakren kaba khlem pud, u la ban jur ba ka kam jong u ka ïahap beit bad ki thong bad jingïalam jong u Rahul.
“Nga trei hapoh ka jingïalam jong u Rahul Gandhi,” ong u Myntri Rangbah ka jylla. U la batai shuh shuh ïa ka jingkular jong u ban pynïaid shakhmat ïa ka jingthmu jong u Rahul ha ka jylla, da kaba kdew kyrpang ïa ka jingkheiñ jaitbynriew kaba dang ïaid shakhmat kum ka jingthmu saiñ hima sima ba ïasam lang jong ki.
U la ïathuh ruh ba ka ïingdorbar jylla kan mynjur ïa ka aiñ ha ka dorbar mang tyngka ban wan kaba ai 42 percent ka jingbuh kyrpang ïa ki BC, bad phah sha ka Parliament.
Ka jingïakynduh hapdeng ki arngut ki nongïalam ka la neh kumba lai kynta eiei, ha kaba u Myntri Rangbah u la ïathuh ïa u Rahul halor ka jingïaid jong ka jingwad bniah ïa ka imlang sahlang, ka pule puthi, ka kam ka jam, ka saiñ pyrthei, bad ka jingwad bniah ïa ka jaitbynriew kaba dang ïaid mynta ha Telangana. U la khot ruh ïa u Rahul sha ka jingïalang paidbah kaba rakhe ïa ka jingjop jong ka jinglum jingkheiñ halor ka jingbun paid.
La sngewthuh ba la aiti ïa u Revanth ïa ka jingkitkhlieh ban ïatreilang bad ki Myntri Rangbah jong ki seng kiba don bynta ha ka kynhun jong ka INDIA ban ïoh jingkyrshan ïa ka jingdawa jong ka Congress ban pynlong ïa ka jingkheiñ jaitbynriew ryngkat bad ka jingkheiñ ha ka jingbun paid ha u snem 2025.
“Ka jingkheiñ halor ka jingbun paid ha ka jylla ka dei ka lynti sha ka ri” u la ong, haba bynrap ba ïa ka jingwad bniah ïa ki jingbun briew la pynlong tang na ka bynta ka jingbha jingmiat jong ki paidbah bad thikna ba ym da ka jingthmu ban ïoh jingmyntoi na ka saiñ pyrthei. U la kynnoh ba ki seng pyrshah ki la pynlong ïa ka kum ka mat khlem da donkam da kaba pynkhihwin ïa ki briew.
Haba jubab ïa ka jingkynthoh jong ki nongïalam ka BJP, u la ong ba um shym la lehbeiñ ïa ka shuki jong u Myntri Rangbahduh ne ïa u Narendra Modi shimet shimet. “Ngam shym la kren ei ei shimet pyrshah ïa u, bad ngam shym la pyni ruh ïa ka jingbym burom ïa u. Nga la pynpaw tang ïa ka jingshisha ba u Modi um dei u BC na ka jingkha. Ka lah ban don ka jingiapher ha ki tarik, hynrei ka jingshisha ka dang sah kumjuh. Kam don kano kano ka jingïaknieh halor kane, namar ki nongïalam ka BJP ruh ki kyrshan ïa kane,” ong u Revanth Reddy.
Haba jubab ïa ka jingkylli halor ka rai jong ka ïingbishar bahakhliehduh kaba la jan ban mih halor ka jingphet noh jong ki MLA ka BRS sha ka ktem Congress, u la ong: “Ngin kohnguh ïa ka rai jong ka ïingbishar bahakhliehduh.” Hynrei u la ong ba u President ba treikam jong ka BRS u KT Rama Rao u dang pynmih ïa ki jingkren bapher bapher wat shwa ba kan mih ka rai jong ka ïingbishar. U la pynkynmaw ïa u KTR ba ïa ka Sabitha Indra Reddy bad ïa u Talasani Srinivas Yadav la pynlong Myntri Myntri ha ka sorkar BRS watla ki dei kiba la shah jied na ki seng bapher bapher.
