U Nongsaiñ Hima, 1969
Ha kito ki jaka kiba ki Phareng ki la jop, ki pynrung shisyndon ïa ki ain khyndew ki aiñ khlaw. Don ka Jingpynïaid ryntih bad ki jingmana jingadong kiba ki nongshong shnong ne ki trai khyndew ne khlaw ki dei ban bud bad pyntreikam. Don ruh ka jingkheiñ jing-diah kaba biang bad kaba thikna bad ym don iwei I dkhot khyndew ne khlaw iba khlem hap ha ka jingkheiñ jingdiah bad ba yn ym tip ba ym don ba long trai. Kumta da kaba leh kumne ym don kano kano ka jingkulmar ne jingïakam kynti, ne ka jingaipata arsien ïa ka juh ka jaka ne ïadie ïathied ïa ka juh ka khyndew ne khlaw arsien lai sien.
Lah ban ong ba ki Phareng kim shym la jop ïa kane ka ri jong ngi bad kumta ka jingpynïaid ïa ka khyndew ne ïa ka khlaw ka shu sah kumba ju long. Ki khlem da lulia eiei ha kane ka liang.Kane ka la long ka jingkyrkhu kaba khraw ïa ka ri. Hynrei kat ba dang ïaid ki sngi ki snem, da ka jingdonkam bun ïa ka khyndew bad ïa ki khlaw ha ki kam pynroi pynsan, ki khyndew ki khlaw ki la kiew dor bad kumta ha kane ka ri jong ngi kumba la long sha kiwei pat ki jaka, la mih ka jingdawa kaba jur ia ka khyndew bad ia ki khlaw bad ka dor ka la kiew kynsan bad tik bad tik.
Kumta ki khmat baroh ki leit sha ki lad kumno ban ioh skut khyndew ne skut khlaw ban lah die pat ïa ki ha ka dor kaba rem y nda la donkam ka sorkar ne kiwei pat ki bynta trei kam jong ka sorkar. Ka jingmih na kane ka la long ba la mih bun ki jingaikam long trai ha ka khyndew ne ia ki khlaw bad la mih ruh bun ki jingïaleh iatur ha ki ïing Bishar. Kumta ha kane ka rukom la mih bun ki jingïaleh bad u soh jong kane ka kam u long ba la lut ka spah ka hajar bad ka por kaba lut ruh ka bym kais huh ha ka leit ka wan ban ïaleh ban ia tur ha ki ïing Bishar. Mih sa ki jingïakynad ha shnong ha thaw, mih sa ki jingïapeit mat don uwei ia uwei pat bad kumta ym don shuh ka shongsuk shongsaiñ ha shnong ha thaw.
Ha ki por mynshuwa ym da donkam eh kata ka rukom kheiñ bad rukom buh jingkheiñ ïa ka khyndew ne ki khlaw namar ba kine ki don kyrhai bad duna ruh u briew, hynrei mynta kam long shuh kumta u briew u la roi bad ki jingwan ki briew ha ka ri jong ngi na kylleng ka la jyllei.
La dei ban don ka jingbuh jingkheiñ jingdiah ïa ka khyndew ne ïa ki khlaw ban tip thikna ïa u pud u sam bad ïa ka jinglong trai. Kane kam mut ba noh khajna hynrei ba yn don kumta ka jingphikir ban lait na ka ïaleh ka ïatur ha ki Iing Bishar bad lah ban tyngkai ïa ka spah ka hajar bad ruh ban don ka suk ka saiñ ha shnong ha thaw hapoh ka ïit ka hima. La sngewdei ban kdew shuh shuh ba kum kata ka jingbuh jingkheiñ jingdiah ka dei ban long katkum ki riti ki dustur bad khlem da ïaid palat ïa ki. Kumta kito kiba don ka jaka kin tip shai ba ka dei ka jong ki bad kito kiba die kiba thied kin tip ba ki die ba ki thied ïa kaei kaei kaba ym hap shuh ban ïaleh ban ïatur. Hato kane, kam pynlait ïa ka Ri na ki jingkhuslai bad ki jingartatien haba ïa thied ïa die jaka ne khlaw bad hato kane kam long ka jingkyrkhu kaba khraw ïa ki briew kiba shong ha ka ?
