Shillong, Rymphang 18
Ka jingpynkhreh ban pynlong ïa ki ar tylli ki jingïalehkai bar ri ha kane ka nongbah ka dang ïaid shaphrang ha kaba na ka liang ka Meghalaya Football Association bad ka Sorkar Jylla ki la shim khia ban pynbit pynbiang ïa baroh ki jingdonkam ha Jawaharlal Nehru Stadium kaba ha Polo.
Na ka liang u Assistant Coach ka India, u Mahesh Gawali u la wan ïuhkjat ha kane ka nongbah ha kaba u la ïoh ban jurip ïa ka JN Stadium bad madan ïalehkai kilanmet ha ka skulbah North-Eastern Hill University.
Kane ka jingwan jurip jong u ka la long hadien ba ka All India Football Federation ka la pynthikna dangshen ba ka JN Stadium kan pynlong ïa ki ar tylli jingïalehkai bar ri jong ka India ha u bnai ban wan. Kaba nyngkong kan dei ka jingïalehkai paralok (FIFA friendly) pyrshah ïa ka Maldives ha ka 19 tarik u Lber bad kawei pat ka dei ka jingïalehkai AFC Asian Cup 2027 qualifier pyrshah ïa ka Bangladesh ka ban long ha ka 25 tarik u Lber.
Ha kane ka jingwan jurip, u Gawali u la ai jingïaroh halor ka jingmaramot ïa ka JN Stadium, da kaba u la ong ba ka long “kawei na ki madan phutbol ba bha tam” ha ka ri baroh kawei. Utei u Assistant Coach u dang bishar bniah ïa ka madan kaba jyrngam, ki jaka ïeng bad ki kamra khreh jong ki nongïalehkai. Ka jingtrei ka dang ïaid shaphrang ban pynbha ïa ka madan ïalehkai bad u Gawali lem bad ki dkhot ka MFA kiba kynthup ïa u Vice-President Bah u Cliff Nongrum, ki la ïakren ban buh ïa ki kamra khreh kiba lah ban rah, bad kiwei kiwei.
Te kumta na ka liang u Gawali u la ai jingmut ba ka madan ïalehkai kaba don ïa ki jaka ïalehkai ba neh kan pynlong shisha ïa ka Shillong kum ka jaka ba pura na ka bynta ka phutbol kaba don ha ka kyrdan ba hakhmat jong ka pyrthei.
Kumba ka paw ka India ka la don ha ka Group-C na ka bynta ka AFC Asian Cup 2027 qualifiers final round ka ban kynthup lang ïa ka Hong Kong, Singapore bad ka Bangladesh. Ki kynhun kin ïakhun arsien ha ka rukom ïalehkai kaba ha ïing bad shabar (home & away) haduh u Lber 2026. Ki kynhun ba ïoh jingjop ha ka jingïalehkai group kin ïoh rung sha kawei pat ka wat jong ka Asian Cup.
