Thiruvananthapuram:
Wat la kam sngewhun ïa u Shashi Tharoor halor ka jingïaroh kaba paw jong u ïa ka sorkar jong ka kynhun Left, hynrei ka Congress kam pat lah shim kano-kano ka jingpynshitom pyrshah ïa une u MP ka Thiruvananthapuram.
Ki heh shipai kim sngewtynnad ïa u Tharoor uba ïaroh ïa u Myntri Rangbahduh ka ri u Narendra Modi, katba ki nongïalam ka jylla ki ïaleh pyrshah ïa u namar ka jingthoh jong u ha ka kot khubor The New Indian Express kaba ïaroh ïa ka sorkar LDF halor ka jingpynïaid jong ka ïa ka jinglong jingman jong ki karkhana ha ka jylla.
Hynrei ka seng ka sngew ba ban shimkhia pyrshah ïa u Tharoor ne ban pan jingpynshai na u ha kane ka por kan ym long kaba stad ha ka por kaba jngai.
Ki nongïalam kim kwah ba ka jingïakren kan nangroi haduh katta katta.
U General Secretary ka AICC u K C Venugopal bad u heh ka KPCC u K Sudhakaran ki la khot ïa u Tharoor bad pynsngew ïa ka nongrim jong ka seng bad ki la kyntu ïa u ban bat skhem ïa u laiñ jong ka seng.
U Sudhakaran u la ïathuh ha ki lad pathai khubor ba u la ïakren bad u Tharoor bad u la ai ïa u ïa ka “jingmut kaba biang.”
“U Shashi Tharoor u la pynpaw ïa ka jingsngew jong u. Ki briew shimet ki lah ban don la ki jingmut. Hynrei ka rai jong ka party ka dei ka laiñ ba thikna”, u la ong.
Halor u nongïalam ba rangbah u M M Hassan uba kyrpad ïa u Tharoor ban hiar shuki noh na ka komiti treikam ka Congress, u Sudhakaran u la ong ba ka dei ka kam jong ki heh shipai ban shim ïa kum kane ka jingkhot.
La ïoh jingtip ba ki nongïalam ka jylla ki la pyntip sha u Tharoor ba ki jingkheiñ jingdiah kiba u la pynshong nongrim ban thaw ïa ki jingmut jong u ki long kiba bakla. Ka sngew ruh ba u Tharoor um dei ban leh kum kane ka jingpeit bniah ha ka por ba ka seng ka pyrshang ban shim ïa ka sorkar Left. Hynrei namar ba u la pynshai ïa ka nong-rim jong u, kam donkam ban leh pyrshah ïa u MP, ka sngew.
“Kum u nongthoh bad nongthoh khubor, u la pynpaw ïa la ka jong ka jingmut halor kawei ka mat. Haba ka seng ka la ong ba ka don da kumwei pat ka jingpyrkhat, u Tharoor katto katne u la pynbeit ïa ka nongrim jong u, da kaba kubur ïa ki jingnoh synñiang jong u Oommen Chandy bad u P K Kunhalikutty. Mynta, ka jingleh kam long kaba lah ban leh pyrshah ïa u”, la ong uwei u heh nongïalam.
Don kiba sngew ba u Tharoor u pyrshang ban pynskhem ïa ka dur ba ïaid shaphrang jong u.
