Shillong, Rymphang 19
Ka Rangkynsai ka la long ka nongjop ha ka Super Division Shillong Cricket League 2024-25 ba la pynïaid da ka Shillong Cricket Association hadien ba ka la pynliem noh ïa ka NFU da 3 wiket ha ka Sngi Balang.
Ha kane ka jingïakhun kaba la long ha madan Polo, ka NFU ka la kam trai ban tied nyngkong ha kaba ka la ïoh 191 run bad shah pynkhyllem 6 wiket ha ki 45 over. U Shubham Rasaily u la khyrwit ïa ka shiteng spah kaba 66 run na ki 119 bol bad u Ayushman Das u la ïoh 46 run na ki 63 bol. Katba u Ram Gurung bad u Ajay Duhan ki la shim mar 3 wiket na ka bynta ka Rangkynsai.
Haba wan shimti ïa ka pali ba ar, ka Rangkynsai ka la lah ban kynjoh sha ka thong ha kaba ka la ïoh 195 run bad shah pynkhyllem 7 wiket ha ki 44.3 over. U Ram Gurung u la khyrwit ïa ka shiteng spah kaba 67 run na ki 85 bol bad u Kishan Lyngdoh u la ïoh 35 run na ki 38 bol. Katba u Neetesh Sharma u la shim 3 wiket bad 2 wiket na u Hasin. Ïa ka nam ‘Player of the Match’ la ïohpdiang da u Ram Gurung uba la lah ban tied 67 run bad shim 3 wiket.
