Hyderabad, Rymphang:
Haba pynskhem ba ka sorkar kmie ka dei ban shim ïa ka jingkitkhlieh ban khanglad ïa ka Andhra Pradesh ban pyndonkam ïa ka um palat ïa kaba la mang, u Myntri Rangbah ka jylla Telangana A Revanth Reddy ha ka Lah Sngi U Blei u la bthah ïa ki heh jong ka tnad Irrigation ban ujor sha ka sorkar pdeng pyrshah ïa ka jingtih um shiliang jong ka jylla ba marjan.
U Myntri Rangbah u la kren shai ruh ba ka jingkitkhlieh ban bhah ïa ka bhah um hapdeng ki ar tylli ki jylla bad ban kheiñ ïa ka Quantum ka shong ha ka Central Water Commission.
Haba pynïaid ïa ka jingïalang bishar bniah bad ki ophisar ka tnad ai um bad u Myntri ka tnad ai um u N Uttam Kumar Reddy, u Myntri Rangbah u la kdew ïa ka jingpyndonkam ïa ki marpoh khyndew da ka Andhra Pradesh bad bthah ïa ki heh ba kin kham husiar ha kaba pyndonkam ïa ka um Krishna na ki projek Srisailam bad Nagarjunasagar.
U la pynskhem ba ka Telemetry System ka dei tang ka lad ban khanglad ïa ka AP ban pyndonkam ïa ka um palat ïa ka bhah ba la buh. Ki heh sorkar ki la wanrah ha ka jingtip jong u Myntri Rangbah ba ka sorkar AP kam wan shakhmat ban siew ïa ka bhah jong ka na ka pisa kaba donkam na ka bynta ban buh ïa ka Telemetry System.
Haba jubab, u Myntri Rangbah u la bthah ïa u Principal Secretary ka tnad Irrigation u Rahul Bojja ban thoh mardor sha ka KRMB, da kaba pyntip ba baroh ka pisa kaba donkam na ka bynta ban pyntreikam ïa ka Telemetry System la siew da ka sorkar Telangana bad ban shim ïa ki sienjam kiba donkam na ka bynta ka Telemetry.
U Myntri Rangbah u la bthah ruh ïa ka Chief Secretary Santhi Kumari ban pyndep ïa ka mat ïakren na ka bynta ka Teleconference bad ki District Collector ban pynmih ïa ki jingbthah kiba donkam.
La bthah ïa ki ophisar jong ka tnad ai um ba kin long kiba husiar haba pynïaid ïa ka um jong ka wah Krishna na Srisailam bad Nagarjunasagar ban ïada na kino kino ki jingthut ha ka jingpynpoi um.
