Shillong, Rymphang 19
Ka Donita School of Martial Arts (DSMA) na Mawkynrew ka la pynkup burom ïa ki khynnah ïalehkai kiba la khur takma ha ka 6th Meghalaya Games kaba la dep long ha Jowai bad ki nongjop ha ka 10th National Jeet Kune Do Championship 2024 kaba la dep long ha NEIGRIHMS, Shillong.
Ïa kane ka jingpynkup burom la pynlong ha ka 14 tarik mynta u bnai ha Thangsning ha kaba la ïadon lang u MLA ka Mawkynrew u Bah Banteidor Lyngdoh kum kongsan, ki dkhot jong katei ka synjuk lem bad ki kmie kpa jong ki khynnah.
Haba ai jingkren ha katei ka sngi, u Bah Banteidor u la pynpaw ka jingkmen kaba khraw halor kane ka jingjop donburom ki khynnah ïalehkai ka thaiñ Mawkynrew. U la ai ka jingkular ban ai jingïarap met bad mynsiem ban kyntiew ïa ki heprit bad samla ban shah hikai ha ka Wushu bad kiwei ki jait jingïalehkai Martial Arts kiba don bad ka Meghalaya School of Martial (MSMA).
Ha kawei pat ka liang u Bah Donny R. Ranee u la pyntip ba ka 39th National Games 2027 kan sa long ha Meghalaya. Namar kata, u la kyrpad ban ai jingkyrshan ïa ki samla ka thaiñ.
