Mumbai, Rymphang:
Hapdeng ka jingkhmih lynti ba ka don ka jingïapher ha ka kynhun synrop kaba bat ïa ka jingsynshar jong ka Maharashtra, ka Mahayuti, halor ka jingweng noh ïa ki nongpahara jong ki MLA ka seng Shiv Sena (jong ka kynhun u Eknath Shinde), u Symbud Myntri Rangbah u Eknath Shinde u la pynshai bad pynshisha ba kam shym la don kano kano ka jingïapynibor ne jingïapher jingmut bad u Myntri Rangbah u Devendra Fadnavis.
U Shinde, uba la seng ïa ka jaka ai jingsumar ha Mantralaya wat la kam don ka jingïoh jingkyrshan na ka Chief Minister’s Relief Fund (CMRF), u la ong, “Ka jingseng ïa kane ka jaka ai jingsumar ka dei ka sienjam kaba shakhmat ha ka jingpyrshang lang jong ngi ban ïarap ïa ki nongshong shnong. Kane kan sa don ka jingïadei bad ka Chief Minister’s War Room bad kan sa lah ban shakri kham bha, ym ban long kum ki jaka ba pyntreikam pyrshah.”
“Kam don satia kano kano ka thma ne ka jingïapher jingmut hapdeng jong ngi. Ngi ïatylli ha ka jingïakhun jong ngi pyrshah ïa kito kiba pyrshah ïa ka roi ka par. Ha ka por ba nga dang long Myntri Rangbah, ha ka 31 tarik, Risaw, 2023, u Symbud Myntri Rangbah u Fadnavis u la seng ïa kum kane ka Cell. Nga la shu pynlong biang ïa ka da ki briew jong nga kiba peit ïa ki jingtreikam jong ka,” ong u Shinde.
U nongïarap bajan jong u Shinde, u Mangesh Chivate, un khlieh ïa kane ka jaka sumar bathymmai.
Kane ka jingpynkylla, kaba lah ban long kaba nyngkong eh ha kane ka jylla, ka wan hapdeng ka jingïakynad hapdeng ki seng baïatreilang jong ka kynhun Mahayuti ha ka sorkar jylla halor ki mat bapher bapher, kynthup ïa ka jingthung ïa ki Myntri nongpeit nongkhmih. “Ka Cell kan ym ai jingïarap pisa hynrei ha ka jaka kata kan ïalam ïa ki briew ha kaba ïadei bad ka jingïoh jingïarap lyngba ki skhim sorkar kiba la don lypa, kynthup ïa ka CMRF, ka skhim hospital ai jingïarap, ka National Child Health Programme, bad ka Ayushman Bharat. Ka thmu ban kyntiew ïa ka jingpyntreikam ïa ka Mahatma Phule Jan Arogya Yojana,” la ong u Chivate ha ka jingïakren bad ki nongthoh khubor.
