Shillong, Rymphang 19
Ka Sumer Football Club ka la jam sha ka semi final ha ka lympung ïalehkai Maitshaphrang Cup 2025 ba la pynïaid da ka KSU Umsning Circle. Kane ka la wan hadien ba ka la lah ban pynliem noh ïa ka Pirates FC da 4-2 kol ha ka Sngi Balang.
Kane ka nam jop ka la wan urlong lyngba u Bonny Khriam uba la thep ar kol ryngkat u Xolangki Nongsiej bad u Denelson Pyngrope.
Ha kane ka jingïakhun quarter final ba lai kaba la long ha madan Umsning, baroh ar kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step.
Dei ha ka kylla miet ba ka Pirates ka la ïoh ban pynkhih jar nyngkong eh lyngba u Oris Sad ha ka minit kaba 58. Nangta, hadien katto-katne por ka Sumer ka la lah ban pynphai kylla haduh saw kol lyngba u Xolangki (62), Denelson (64) bad u Bonny (65 & 73).
Hapdeng kane ka jingïakhun ka Pirates ka la lah ban pynphai kylla shi kol lyngba u Bickyson Kharkongor (76) ha shwa ba kan shah rem noh.
Lah ban pynkynmaw ba ki kynhun kiba la rung sha ka semi final ki long ka Lamare FC bad ka Nangkiew Benris FC.
