Shillong, Rymphang 19
Ka Nangkiew Irat SC ka la pynliem noh ïa ka Nongthymmai SC da 2-1 kol na ka bynta ban ïoh jingjop ha ka Shillong Premier League 2024 kaba la long ha ka Sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba ka jingïarap pynthep da uwei na ki rangïalehkai ka Nong -thymmai (49′) bad u Banraplang Nongsteng (78′) ha shwa ba ka jingbakla jong u nongapkol u Surjay Kumar Pariyar kaba la ailad ïa u Mowell Chyne (87′) ban pynphai kylla na ka bynta ka Nongthymmai. Hynrei hadien u Surjay u la lah ban kyrda na ka jingshah thep lyngba ka penalty ba la shut da u Donbok-lang Majaw.
Lah ban pynkynmaw ba ha ka wat ba nyngkong kaba la long ha ka 6 tarik u Nohprah 2024, ka Nangkiew Irat ka la lah ban pynliem da 4-2 kol ïa ka Nongthymmai.
Lyngba kane ka jing-jop ka la pynlong ïa ka Nangkiew Irat ban don 19 point hynrei kam shym la kiew kyrdan na kaba hynriew. Katba ka Nongthym -mai ka la don ha u laiñ jong ka jingma bad don ha ka kyrdan khyndai.
Wat la ka jingïalehkai ka la long kaba ïakhaid bha ha ka kylla step, hynrei dei ha ka kylla miet ba ka Nangkiew ka la ïoh ei shi kol na ka daw ka jingbakla thep hi u rangapkol ka Nongthymmai u Akash Thapa. Une u rangïalehkai u la pyrshang ban kyrda ïa u Wallamsuk Nongkhlaw hynrei ym shym la lah ban leh eiei.
Hadien katto-katne por ka Nangkiew ka la thep biang ïa ka kol ba ar lyngba u Banraplang shwa ba ka Nongthymmai kan pynphai kylla lyngba u Mowell ha ka minit kaba 87 ha kaba u Surjay um shym la lah ban kyrda na ka jingshah thep.
Kaba kham sngewtynnad ka long ba ha kane jingïalehkai la pynïaid da ki rephri, ba kynthup ïa ka rephri ba kongsan (main referee) ka Luckymerry Lyngdoh, ryngkat ki asst. referee bad ka fourth official.
Ka jingïalehkai ha ka Sngi Palei kan long hapdeng ka Nongrim Hills SC pyrshah ïa ka Shillong Lajong FC ha ka por 3 baje nohphai sngi. Ha ka wat nyngkong ba la long ha ka 6 tarik u Kyllalyngkot, ka Lajong ka la jop da 1-0 kol.
