Shillong, Rymphang 20
Ka hat-trick na u Kylian Mbappe ka la biang pura ïa ka Real Madrid ban jam sha ka pre-quarter final hadien ba ka la lah ban pynliem noh ïa ka Manchester City da 3-1 kol ha ka Champions League na ka bynta ban tam da 6-3 (aggregate) ïa katei ka lahduh jong ka aïom ba la dep.
Katba ha kawei pat ka jingïakhun ka PSV ka la pynliem noh ïa ka Juventus da 3-1 kol na ka bynta ban tam da 4-3 ha ka aggregate bad ban pynthikna ban jam sha ka pre-quarter final.
Ha kane ka jingïakhun kaba la long ha ka Sngi Palei, u Mbappe u la pynkhih jar nyngkong eh ha ka minit kaba 4. Une u khlur ïalehkai ka France u la pynbud ïa ka kol ba ar ha ka minit kaba 33 bad u la ïoh shisyndon ïa ka hat-trick da kaba thep ïa ka kol ba lai ha ka minit kaba 61. Hynrei ka City ka la lah ban pynphai kylla shi kol shwa ban wai lyngba u Nico Gonzalez (90+2) shwa ba kan mad ïa ka jingshah rem.
Kumjuh, ka PSV ka la lah ban thep kol lyngba u Ivan Perisic (53′), Ismael Saiban (74′) bad u Ryan Flamingo (98′), hynrei ka Juventus ka la pynphai kylla lyngba u Timothy Weah (63′).
Ha kawei pat ka jingïakhun, ka Paris Saint-Germain ka la lah ban pynjem khnap ïa ka klob na France ka Brest haduh 7-0 kol na ka bynta ban tam da 10-0 lyngba ka aggregate. Te kumta kane ka kynhun ka lah ban ïakynduh pyrshah ïa ka Liverpool lane ka Barcelona ha ka pre-quarter final.
Katba ka Dortmund ka la lah ban pynthikna hadien ba ka la ïakhaid khlem don ba thep kol pyrshah ïa ka Sporting na ka bynta ban tam da 3-0 lyngba ka aggregate.
Te kumta ka Real Madrid, PSG, Dortmund bad ka PSV, ki la ïasoh lang bad ka Bayern Munich, Benfica, Club Brugge bad ka Feyenoord sha ka pre-quarter final. Kine ki kynhun kiba la ïoh jingjop kin pynkhreh ïa ki jingïakhun jong ka wat nyngkong (first-leg) ki ban long ha ka 4 tarik u Lber.
Nangta, phra tylli ki kynhun kiba don ha ka kyrdan ba hakhmat eh na ki lai taïew mynshwa ki la ïaid lait ïa ka ‘playoff’ bad ki la rung sha ka pre-quarter. Kine ki kynthup ïa ka Liverpool, Barcelona, Arsenal, Inter Milan, Atletico Madrid, Bayer Leverkusen, Lille bad ka Aston Villa. Kin pynkhreh ïa ka wat ba ar ka ban long ha ka 11 tarik u Lber.
