Shillong, Rymphang 20
Ka NorthEast United FC kan ïakhun pyrshah ïa ka Bengaluru FC ha ka lympung ïalehkai Indian Super League (ISL) 2024-25 ha Jawaharlal Nehru Stadium ha ka por 7:30 janmiet.
Kane ka long ka jingïakhun ba ar jong ka NEUFC ban ïalehkai ha kane ka nongbah bad ha ka jingïalehkai ba la dep ka la shah rem ha ka Mumbai City da 2-0 kol.
Ka Bengaluru FC ka la long ka kynhun kaba khlem lah jop ha saw tylli ki jingïalehkai ba khatduh jong ka jingïaid lynti kaba kynthup ar sien ka jingshah rem. Hynrei, kane ka kynhun ka la long ka jingkyrmen ha ka jinglah ban thep kol haduh 36 kol, kaba dei ka kol kaba ar ha ka khana pateng jong ka ISL, ha kaba u Sunil Chhetri u la lamkhmat ïa ka jinglah ban thep kol, da ka jingïarap jong 11 tylli ki kol.
Te kumta ka BFC ka don jingkyrmen ban ïoh jingjop namar ka NorthEast United FC kam shym la lah ban ïoh jingjop ha ki san tylli jingïakhun kiba ka la ïakynduh teng. Ki arliang mamla ki la ïakhun lai sien lynter bad kawei pat ka jingïakhun kan long ka sien kaba lai ba ka NEUFC kan ïakhun saw sien lynter pyrshah ïa kawei ka kynhun ïalehkai ha ka ISL.
Ha kawei pat ka liang ka NorthEast United FC ruh ka don la ka jong ka rekod ban ïada, namar ha ka jingïalehkai ba la dep ka la mad ïa ka jingshah rem da 0-2 kol ha ka Mumbai City FC. Ki jingïalehkai, bad ka jingshah thep ha kane ka jingïalehkai kan pyni ïa ka jingïalehkai kaba kham itynnad ha kane ka jingïakhun.
Kumba ka paw baroh ar tylli kine ki kynhun ki dang don hapdeng ka jingïaknieh ban ïoh rung sha ka playoff, namar ka NorthEast United FC ka don ha ka kyrdan ba saw ryngkat 32 poiñ na 21 tylli ki jingïakhun, katba ka Bengaluru FC ka don 31 poiñ na ki 20 sien ïakhun bad ka don ha ka kyrdan ba hynriew ha ka miej kheiñ poiñ. Kumjuh ka United ka la tam tang 3 poiñ ïa ka Odisha FC (29), kaba don ha ka kyrdan ba hynñiew.
