Hyderabad, Rymphang:
Hadien katto-katne sngi ba u Myntri Rangbah ka jylla Telangana u A Revanth Reddy u la ban jur ïa ka jingdonkam ïa ki nongtrei sorkar ban pynkylla ïa ka “jinglong jingman” jong ki, u Myntri ka tnat Excise u Jupally Krishna Rao ha ka Sngi Ba-ar u la kynnoh ba katto-katne ngut ki ophisar IAS kim ïatreilang bad ka sorkar ha kaba pynïaid ïa ki kam ba man ka sngi.
Haba kren sha ki lad pathai khubor ha ophis jong ka Congress Legislature Party (CLP) kaba don ha phyllaw jong ka ïingdorbar, u Myntri u la ong ba ki don ki File kiba la buh lypa da ki bnai. “Balei dei ban buh ïa ki File ha ki snem? Donkam ban pynkylla ïa ka rukom synshar. Hooid, ka sorkar jong ngi kan ym sngap jar”, u la ong.
Ha kaba ïadei bad u Working President ka BRS u KT Rama Rao uba kynthoh ïa ka sorkar Congress, u la ong, “U KTR u dei ban lehraiñ, u kynnoh ba ka sorkar Congress ka pynslem ban siew ïa ki tulop jong ki Sarpanch. Dei ka sorkar BRS ha kata ka por kaba la pynsahkut ïa ki Bill da ki snem.”
Ha kajuh ka por, u Myntri u la ong ba ki paidbah ka Telangana ki la jop ïa ka BRS ha ka ilekshon Assembly bad Lok Sabha bad mynta ki dang ap ban ai ïa ka rai kaba kum kane ha ka ilekshon Local Body ban wan.
