Srinagar, Rymphang:
Ki heh pulit ha Kashmir ki la khynra ïa ki phew tylli ki dukan kot bad la kurup da ki spah tylli ki kopi ki kot jong uwei u riewstad Islam, kaba la pynmih ïa ka jingbitar jong ki nongïalam Muslim.
Ki pulit ki la ong ba ka jingpynlong ïa ka jingleit khynra ka la long halor ka jingdon jong ki kot ba la die bad sam kum shi bynta ban pynsaphriang ïa ki buit bad ki jingthmu jong ka kynhun lehnoh ba la shahñiew beaiñ.
Ki pulit kim shym la jer kyrteng ïa u nongthoh, hynrei ki trai dukan ki la ïathuh ba ki la kurup ïa ki kot jong u Abul Ala Maududi uba la khlad noh, u nongseng jong ka seng saiñ pyrthei ka Islam ka Jamaat-e-Islami.
Ka sorkar Hindu ha ka ri ba la lamkhmat da u Myntri Rangbahduh u Narendra Modi ka la ñiew beaiñ ïa ka kynhun seng Jamaat-e-Islami ha u snem 2019 ha Kashmir ha kaba la ong ba kane ka seng ka dei kaba beaiñ.
Ka New Delhi, ka la pynthymmai ïa katei ka jingñiew beaiñ, ha u snem ba la lah, na ka bynta kaei kaba ka la ong, ba ki dei ki kam pyrshah ïa ka jingshngaiñ, ka jinglong ba janai bad ka jingsynshar jong ka ri.
Ki pulit kiba la riam kum ki riewpaidbah, ki la sdang ban khynra ha ka sngi Saitjaiñ ha Srinagar, shwa ban sdang ïa ka jingkurup kot ha kiwei pat ki nongbah ha kylleng ka thaiñ, kiba bun ki Muslim.
“Ki (pulit) ki la wan bad shim lut ïa baroh ki kopi jong ki kot ba la thoh da u Abul Ala Maududi da kaba ong ba kine ki kot ki dei kiba la khang bad ñiew beaiñ”, la ong uwei u trai dukan kot ha Srinagar ha ka AFP, u bym kwah ban pynpaw kyrteng.
“La lap ba kine ki kot ki long kiba pynkheñ ïa ki kyndon aiñ, bad la shim ïa ka sienjam kaba tyngeh pyrshah ïa kito kiba lap ba ki don ïa kum kine ki tiar,” la ong ki pulit ha ka kyrwoh khubor.
Ki pulit ki la ong ba ïa kitei ki jingkhynra la pynlong “ban khanglad ïa ka jingpynsaphriang ïa ki kot ba la khang kiba ïadei bad ka Jamaat-e-Islami.”Ki jingkhynra ki la pynmih ïa ka jingbitar hapdeng ki nongkyrshan jong ka seng.
“Ki kot ba la ïoh kurup ki kyntiew ïa ka akor kaba bha bad ka jinglong nongshong shnong ba don ka jingkitkhlieh,” la ong u Shamim Ahmed Thokar. U Umar Farooq, u nongïalam niam ba Rangbah jong ki Muslim ha Kashmir bad u nongïalam ba pawnam uba ïasaid na ka bynta ka hok ban rai hi dalade, u la pynrem ïa kane ka jingleh jong ki pulit.
“Ka jingthombor beiñ ïa ki kot Islam bad ban kurup ïa ki na ki dukan kot ka long kaba sngew lyngngoh,” ong u Farooq ha ka kyrwoh, da kaba kdew ba ïa ki kot la lah ban ïoh Online.
Ki nongkynthoh bad kiba bun ki nongshong shnong jong ka Kashmir ki ong ba ïa ka jinglaitluid jong ki nongshong shnong la pynduna shibun hadien ba ka sorkar jong u Modi ka la pynjari ïa ka jingsynshar beit beit ha u snem 2019 da kaba weng noh ïa ka jingsynshar shi bynta jong ka Kashmir kaba la pynskhem da ka riti synshar ka ri.
