Shillong, Rymphang 20
Ka India ka la ïoh jingjop kaba nyngkong ha ka lympung ïalehkai Champions Trophy 2025, hadien ba ka la lah ban pynliem noh ïa ka Bangladesh da 6 wiket ha ka Sngi Palei ha Dubai International Stadium, Dubai.
Kane ka nam jop ka la wan urlong lyngba ka jingïalehkai bha u Shubman Gill (not out), uba la lah ban khyrwit ïa ka spah run kaba 101 na ki 129 bol na ka bynta ban pynlong ïa ka India ban kynjoh sha ka thong da kaba ïoh 231 run bad shah pynhap 4 wiket.
Utei u nongtied kynsai u la lah ban khyrwit 9 tylli ki ‘four’ lem bad 2 tylli ki ‘six’ ha kaba u la lah ban ïatied lang ryngkat bad u Rohit Sharma (kapten), uba la ïoh 41 run na ki 36 bol (7x4s). Hadien ka jingshah pynkhyllem noh une u kapten, u Gill ha kaba kut u la ïatied lang bad u KL Rahul (not out) uba la ïoh 41 run na ki 47 bol na ka bynta ban pynlong ïa ka India ban kynjoh sha ka thong ha ki 46.3 over.
Kham ha shwa ka Bangladesh kaba la shimti ban tied nyngkong, ka la ïoh 228 ruh hadien ba ka la shah pynkhyllem baroh ki nongtied ha ki 49.4 over. Ha kaba nyngkong kane ka kynhun kam shym la lah ban ïalehkai bha ha kaba ka la shah pynhap wiket iwei hadien iwei ha kaba u Mohammed Shami u la shim 5 wiket, kumjuh u Harshit Rana 3 wiket bad u Axar Patel 2 wiket. Hynrei hadien kane ka kynhun ka la sdang ban ïalehkai bha lyngba u Towhid Hridoy, uba la lah ban khyrwit 100 run na ki 118 bol (6x4s & 2x6s) bad u Jaker Ali u la khyrwit ïa ka shiteng spah kaba 68 run na ki 114 bol (4x4s).
Ka India kan pynkhreh ïa ka jingïakhun ba ar pyrshah ïa ka Pakistan ha ka 23 tarik mynta u bnai.
