New Delhi, Rymphang:
U Chief Election Commissioner (CEC) ba dang shah thung thymmai, u Gyanesh Kumar, u la shimti ïa ka kam ha ka sngi Balang, ha ka jaka jong u Rajiv Kumar, uba la hiar shuki ha ka Sngi Ba-ar, kum u khlieh jong ka kynhun ba dei khmih ha ki kam ilekshon.
U Vivek Singh Joshi, uba dei u ophisar barim jong ka Haryana cadre IAS, u la shimti ïa ka kam kum Election Commissioner.
Ha ka khubor jong u sha ki nongthep vote hadien ba u la shimti ïa ka kam, u Kumar u la ong, “Ka sienjam kaba nyng-kong eh na ka bynta ban tei ka long ban thep vote. Kumta manla ki nongshong shnong jong ka ri India kiba la dap 18 snem ka rta ki dei ban long ki nongthep vote bad ki dei ban thep borabor ïa ki vote man ba don ki ilekshon.”
U Kumar u la pynskhem ba ka “Election Commission ka la don, dang don bad kan don beit bad ki nongthep vote.” U Election Commissioner naduh u Lber 2024, u Kumar u la shah kyntiew kum CEC ha ka Lah Sngi U Blei.
U Kumar, uba la 61 snem ka rta, u dei u ophisar jong ka kynhun Indian Administrative Service (IAS) jong ka kyrdan 1988, uba la bat ïa ki katto katne ki kyrdan kiba heh bad kiba khia ha ka jingim jong u.
U Kumar u la long CEC uba nyngkong ban shah thung hapoh ka jingtreikam jong ka aiñ ban thung ïa ki dkhot jong ka Election Commission (EC) lait noh ki Chief Justice of India (CJI) na ka kynhun ba dei ban jied.
Shwa ban leit sha ka Election Commission ha u snem ba la lah kum uwei na ki Commissioner jong ka, u la shongthait noh kum u Secretary jong ka Ministry of Cooperation, ka bynta ba khatduh jong u ha ka kam sorkar.
La ïathuh ba u Kumar, u dei uba ïajan bha bad u Myntri ka tnat ki kam pohïing jong ka sorkar pdeng, u Amit Shah, uba dei uwei na ki dkhot ha ka kynhun nongjied ïa u, uba la thung ïa u ha kane ka kyrdan.
Ka Congress ka la kynthoh ïa ka jingthungkam “kyrkieh” ïa u Kumar ha kaba la ong ba kane ka long kum ka jingpynkheiñ ïa ka “mynsiem bakongsan jong ka riti synshar ka ri” bad “ka jingbym burom ïa ka ïingbishar.”
Ka Supreme Court kan bishar ïa kane ka mukotduma kaba ïadei bad ka jingthung ïa ka CEC bad ki Election commissioner (EC) katkum ka aiñ jong u snem 2023 ha ka sngi Balang.
Kane ka jingthung ïa u Kumar ka long hashwa ka ilekshon bakongsan ba kynthup ïa ka ilekshon Assembly ha Bihar ha kaba kut jong une u snem bad ka ilekshon ha ka jylla West Bengal, Assam, bad Tamil Nadu ha u snem 2026.
