Shillong, Rymphang 20
Ka jingangnud ka Shil-long Lajong FC ban ïaknieh ïa ka nam lahduh ha ka Shillong Premier League 2024 ka la pulom noh hadien ba ka la ïakhaid mar 1-1 kol pyrshah ïa ka Nongrim Hills SC ha ka Sngi Palei ha SSA Stadium kaba ha First Ground, Polo.
Ha kane ka jingïakhun ka Lajong ka la long kaba donbok namar ka la lah ban pynphai kylla ha shwa ban wai ka jingïakhun lyngba u Ïohborlang L Lyngkhoi (90’+5) na ka bynta ban ïakhaid mar shi kol. Ka Nongrim Hills ka la pynkhih jar nyngkong lyngba u Bankyrshan Ryndong ha ka minit kaba 47.
Lyngba kane ka jingïakhaid ka la pynlong ïa ka Lajong ban ïai don ha ka kyrdan ba-ar hynrei ka dang duna sa ar poiñ ïa ka lahduh barim (Mawlai SC). Kumba ka long mynta ka SLFC ka don 33 poiñ na ki 14 sien ïakhun, katba ka Mawlai ka don 35 poiñ na ki 13 sien ïakhun. Ka Nongrim Hills ka dang ïai sah ha ka kyrdan ba phra ryngkat 15 poiñ, hynrei ka Sawmer SC (15 poiñ) ka la don ha ka kyrdan ba hynñiew hadien ba ka la tam lyngba ka jingïapher kol.
Ha kane ka jingïakhun ka Nongrim Hills ka la lah ban ïalehkai bha hadien ba ka la pynmih da ki rangïalehkai kiba ju shah pynshongben, kum u rangapkol ba la jied ba lai u Kitboklang Marbaniang, uba la lah ban ïalehkai bha na ka bynta ban khanglad ïa ki jingpyrshah jong ka liang pyrshah. Kumjuh u Bankyrshan uba dei u rangthep kol um dei uba la ïoh ban ïalehkai man ka por, hynrei u la lah ban pynpaw ïa ka jingtbit ha kane ka jingïakhun.
Kumba ka paw ha ka kylla step ka Lajong ka la ïoh ar tylli ki kabu kiba biang ban pynkhih jar, hynrei u Kitboklang u la lah ban kyrda na ka jingshah thep bad u Riborlang L Lyngkhoi um shym la lah ban pynurlong ïa ka kabu ksiar ba u la ïoh.
Hadien ba la bteng biang ïa ka jingïakhun jong ka kylla miet, u rangïalehkai barim ka SLFC u Glennys Lynrah u la ïoh ïa ka kabu kaba biang ban pynbuh bol na ka bynta u Bankyrshan, hynrei u bym shym la pynlehnohei ïa kane ka kabu ksiar ha kaba u rangapkol ka Lajong u Siwel Rymbai um shym la lah ban kyrda na kane ka jingshah thep.
Kumba ka paw ym shym la don napdeng ki kynhun ki ban lah thep kol kham bun ban ïa ka Lajong ha kane ka aïom kaba la thep haduh 46 kol shwa ïa kane ka jingïakhun. Ha kane ka kynti kaba mynta ka la shem jingeh ban pynpra ïa ki rangïalehkai shadien ka Nongrim Hills. Lah ban kdew ha ka wat kaba nyngkong, ka Lajong ka la jop da ka said ïa ka Nongrim Hills da 1-0 kol.
Ka Lajong ka la ïai bteng ban ïakhun tyngeh shuh shuh, ha kaba ka la shah khanglad ïa ka offside bad kumjuh ka penalty kaba la shah kyntait noh ha u rephri. Ha shwa ban wai, u Shanborlang Thangkhiew u la kum pynur ïa uwei u rangïalehkai ka Lajong hapoh ‘box’. Dei hangne ba u Ïohborlang u la lah pynurlong ban thep kol lyngba ka penalty ha kaba u Kitboklang um shym la lah ban kyrda na ka jingshah thep.
Ka jingïalehkai kan bteng biang ha ka Sngi Saitjaiñ ha kaba ka Ryntih FC kan ïakhun pyrshah ïa ka Laitkor SC ha ka por 11 baje mynstep, katba ka Sawmer ïa ka Mawlai ha ka por 3 baje nohphai sngi.
