Shillong, Rymphang 21
Ka Bengaluru FC ha ka janmiet Sngi Thohdieng ka la pynliem noh ïa ka NorthEast United FC da 2-0 kol ha ka jingïalehkai Indian Super League (ISL) 2024-25 kaba la long ha Jawaharlal Nehru stadium, Shillong. Haba phai sha kane ka jingïakhun ka North East United FC ka la lah ban lehkai bha hynrei kam shym lah pat ban pynurlong ïa ki kabu ba ka la ïoh. Kane ka la pynlong ïa ka Bengaluru FC ban ïoh jingjop bad buh pat ïalade ha ka kyrdan ba saw ha ka miej kheiñ poiñ da kaba ïoh 34 poiñ na 21 tyllli ki jingïakhun, katba ka NorthEast United FC ka la hiar sha ka kyrdan kaba san ryngkat 32 poiñ na 22 tylli ki jingïakhun.
Haba phai sha kane jingïakhun ka Bengaluru FC ka la lah ban synshar bha ïa ka bol naduh kaba sdang jong ka jingïakhun ha kaba ka la ñion tyngeh ïa ka North East United FC. Kumta dei ha ka minute kaba lai ba ka Bengaluru FC ka la ïoh ka lad ban pynurlong ïa ka kol ba nyngkong jong ka lyngba u Ryan William.
Na ka liang ka North East United FC ka la ïoh ïa ka kabu ban pynïakhaid ïa ka shi kol lyngba u Alaaeddine Ajaraie hynrei kane kam shym la urlong namar ba u rangap kol ka Bengaluru FC u Lalthuammawia Ralte u la lah ban kyrda ïa ka kol. Ka North East United FC ka la ïoh shibun ki kabu ban pynphai ïa ka shi kol jong ka Bengaluru FC lyngba ki bol ba la pashat na u Redeem Talang hynrei kine baroh kim shym la urlong namar ka jingtbit u rang ap kol ka Bengaluru.
Haba phai sha ka jingïakhun ha ka kylla miet, kine baroh ar tylli ki kynhun ki la sdang ban lehkai bha ha kaba ka North East United FC ka la jan ïoh ban thep ïa ka kol lyngba u Thoi Singh hynrei u Ralte rangap kol ka Bengaluru FC u la lah ban kyrda ïa kane ka bol.
Ha shwa ba ka jingïakhun kan poi sha kaba kut ka Bengaluru FC lyngba u Alberto Noguera ka la ïoh pat sa shisien ban pynkhih ïa ka jar ha ka minute kaba 81. Da kane ka jinglah jong ka Bengaluru ban thep ïa kine ar kol ka la pynlong ïa ka North East United FC ban mad ïa ka jingshah rem sa shisien pat ha ka jingïalehkai ha la ïing.
Kum ban shu pynkynmaw ba ka NEUFC ha ka jingïakhun dangshen kaba la long ha Nongbah Shillong ka la shah rem ha ka Mumbai City FC da 2-0 kol bad mynta ka kynti ruh ka la mad ïa ka jingshah rem pyrshah ïa ka Bengaluru FC da 2-0 kol.
