Delhi, Rymphang 20
U Vice Captain jong ka kynhun kriket India, u Shubman Gill, u la kiew sha ka thup kyrdan ba nyngkong (No. 1) napdeng ki nongtied ha ka kyrdan jong ka ICC ODI. Ha ka 19 tarik u Rymphang, u Gill u la pynkhyllem noh ïa u Babar Azam jong ka Pakistan, halor ka jingïalehkai kaba seisoh jong u pyrshah ïa ka England ha ka jingïakhun ba dang shen ha la ïing.
Ka ICC ka la pynmih ïa ka thup kyrdan ba thymmai tang ha shuwa ban sdang ïa ka Champions Trophy jong ki 8 tylli ki kynhun ha Karachi ryngkat ka jingïakhun hapdeng ka Pakistan bad ka New Zealand.
“U Shubman Gill, u rangïalehkai kti kamon jong ka India, ula tam ïa u kapten barim jong ka Pakistan, u Babar Azam, ban long u nongtied ODI ba hakhmat eh ha ka pyrthei,” la ong ka ICC.
U Gill uba la kamai ar tylli ki san phew ron bad kawei ka spah ron (centuri) ha ka jingïalehkai ODI kaba dang shen pyrshah ïa ka England ha la ïing ha kaba ka India ka la jop da 3-0, u la kiew shi kyrdan sha ka kyrdan ba nyngkong. Mynta u don 796 tylli ki rating point haba ïanujor bad u Babar uba don 773 tylli.
U kapten jong ka India u Rohit Sharma u don ha ka kyrdan ba lai da kaba kamai 761 poiñ nangta sa u Henrich Klaasen na South Africa bad u Daryl Mitchell na New Zealand marïabud ha ka kyrdan kaba saw bad kaba san.
“Kane ka dei ka sien kaba ar ba u Gill u bat ïa ka kyrdan No.1 ha ka kriket ODI, ha kaba une u nongtied ba kynsai jong ka India u la tam ruh ïa u Babar ban ïoh ïa ka kyrdan ba hakhmat eh ha pdeng jong ka ICC Men’s Cricket World Cup ha u snem 2023.
