Shillong, Rymphang 21
U MLA ka West Shillong konstitwensi bad uba dei ruh u Working-President ka United Democratic Party (UDP), Bah Paul Lyngdoh, u la ong ba kum ka seng ka don ïa ka jingsngewskhem kaba khlaiñ ba napoh ka Jaïaw-Mawprem konstitwensi, u kyrtong ka seng kata u Bah Auguster Jyrwa un rah ïa ka jingjop ha kane ka ilekshon MDC.
Kum ban shu kdew hangne, ki don saw ngut ki kyrtong kiba ïakhun na kane ka konstitwensi kiba kynthup ïa u Bah Auguster Jyrwa na ka seng UDP, u Bah Denzyl R. Chen na ka Voice of the People Party (VPP), u Bah Thomas Passah na ka Khun Hynñiewtrep National Awakening Movement (KHNAM) bad u Bah Gerald Shullai na ka Congress.
Haba kren sha ki lad pathai khubor ha ka jingwan ban thep ïa la ka vote ha ka 21 tarik u Rymphang, 2025, u Bah Paul u la ong ba ka jingïakhun kaba tyngeh ha ka ilekshon kam dei hapdeng ki kyrtong jong ki seng saiñpyrthei kiba ïeng pyrshah hynrei ka dei hapdeng ka jinglong kaba nalade kumno ki kyrtong ki long bad kumno ki leh.
U la ong ba u don ïa ka jingsngewskhem ba ka seng UDP kan ïalam ïa ka Executive Committee (EC) bathymmai hapoh ka Khasi Hills Autonomous District Council (KHADC) da kaba bynrap ba katkum ka jinglong-jingman, la sngewthuh shai ba ka UDP kan sa leh kham bha ha baroh ki konstitwensi jong ka KHADC.
“Nga don ïa ka jingsngewskhem ba ngin sa ïalam ïa ka EC bathymmai hapoh ka KHADC bad katkum ki jingpynpaw, ngi sngewthuh shai ba ka UDP kan sa leh bha ha kylleng ki distrik bad ki jaka jong ka Rilum Khasi bad hangne hapoh ka Jaïaw-Mawprem konstitwensi ruh, ngi don ïa ka jingsngewskhem kaba khlaiñ ba ngin poi sha ka thong”, ong u Bah Paul.
Haba kylli halor ka jingïoh duna vote ka UDP ha ka ilekshon MP kaba la long mynshem snem, u Bah Paul u la ong ba ka ilekshon MP ka ïapher na ka ilekshon MLA bad ka ilekshon MDC namar kawei ka ilekshon ka ju ïapher na kawei ka ilekshon sha kawei pat.
“Ha kane ka kynti da ka jingpynjur ïa ka jingïalap ilekshon da ki nongïalam bad ki nongtrei jong ka seng bad kane ka ilekshon ka ïaid halor ki mat ba ïadei bad ka thaiñ bad ki paidbah ki shah pynsngewthuh shaphang ka jingbun ki jingeh kiba ki ïakynduh ha ka KHADC, kumta nga sngewskhem ba ngi la lah ban kren ïa ki mat ïakren kiba donkam bad ngin sa ïoh ïa ka jingjop”, ong u Bah Paul.
U la ong ruh ba um pat lah satia ban ong ba ka seng UDP kan leit ban ïasynroplang lang bad kino-kino ki seng saiñpyrthei hapoh ka KHADC hynrei ka jubab kan sa wan hadien ynda la pynbna ïa ki vote ha ka 24 tarik u Rymphang, 2025.
“Ngin sa peit ha ka 24 tarik ïa ka jingdon ki kyrtong ki ban jop ha katei ka sngi bad ha kajuh ka por ruh, ngam kwah ban shim rai na ka bynta kito ki kyrtong ki ban shah jied ha katei ka sngi hynrei ka dei ka bynta jong ki ba kin shim ïa ka rai ha ryngkat ka jingïatreilang bad ka seng”, bynrap u Bah Paul.
