Shillong, Rymphang 21
Ka kynhun ïalehkai Roll Ball jong ki shynrang ka jylla ka long ba la pynkhreh ban leit ïashim bynta ha ka 21st Senior (Above 17) National Roll Ball Championship ka ban long naduh ka 22 tarik haduh ka 25 tarik u Rymphang 2025, ha Kongunadu Engineering College, Thottiyam, Tiruchirapalli District, Tamil Nadu.
Kane ka kynhun jong 10 ngut ki ‘rangïalehkai Roll Ball ka Jylla ba la lamkhmat da u Bah Seiborlang Marbañiang kum u Coach, ki ‘rangïalehkai ki kynthup ïa u Elnathan D Kshiar, u Mewanshanlang Nongbri, na East Khasi Hills District, u CaldySteward Nongsiang (Kapten), u Colin Jona Iawphniaw, u Eric Aibor M. Marboh (GK), u Ferrando Ehbok Pyngrope, u Freddy Lumlang Marboh (Vice Captain), u Calvert Jason Iawphniaw (GK), u Banskhemlang Wahlang bad u Shemkupar Mawbon kiba dei na West Khasi Hills District.
Kane ka kynhun na ka Jylla kan hap ban ïakhun tyngeh bad kiwei pat ki kynhun na 28 tylli ki Jylla ban ïaknieh ïa ka nam lahduh ha kane ka lympung.
Ka kynhun ïalehkai Roll Ball ka jylla ryngkat bad ki nongpynïaid ki long ba la khreh ban leit ïashim bynta ha katei ka lympung da ka jingthmu ban kin ïoh wanrah nam bad ka burom ïa ka Jylla.
