Patna, Rymphang:
Ka National Investigation Agency (NIA) ka la pynlong ïa ka jingkhynra kaba ïatreilang ha Bihar, Jammu & Kashmir bad ha Telangana kum shi bynta jong ka jingtohkit kaba dang ïaid shakhmat halor ki pisa thok kiba la kynnoh ba ki don jingïadei bad ka Pakistan.
Katkum ka jingong jong ka NIA, “la pynlong ïa ka jingleit khynra kaba jur ha ki san tylli ki jaka ha Bihar bad kawei kawei ha Jammu & Kashmir bad Telangana kum shibynta jong ka jingtohkit jong ka NIA halor ka kam khaïi pisa thok ba la pyntreikam da kiba shah kynnoh bad suba donkti na Nepal da kaba pyndonkam ïa ka pisa Crypto”.
La pynlong ïa ki jingkhynra ha ki distrik kum ha Patna, Bhagalpur, bad Bhojpur ha Bihar, Anantnag ha Kashmir bad Hyderabad ha Telangana.
“Ka pisa kaba la kot sha ka 1.49 lak tyngka ryngkat ki tiar Digital ba kynthup ïa ki Pen Drive, ki Mobile Phone, ki Sim Card bad kiwei kiwei, la ïoh ban kurup ha ka jingkhynra. Ka kynhun ka la lap ruh ïa ki katto katne ki kot ki sla kiba long beaiñ,” ong ka tyllong khubor.
