New Delhi, Rymphang:
Ki nongïalam ka kynhun National Democratic Alliance (NDA), kiba la ïoh mynsiem na ka jingjop ha ka ilekshon sha ka ïingdorbar thawaiñ jong ka nongbah Delhi, ki la rai ban ïa khunlang ha baroh ki ilekshon jylla ban wan ha kine ki ar snem ban wan. Ïa kane ka rai la shim ha ka jingïalang ba la pynïaid da u Myntri Rangbahduh ka ri u Narendra Modi jong baroh ki nongïalam bad ki Myntri Rangbah ka kynhun NDA, tang hadien ba la dep bam smai ka Myntri Rangbah ka Delhi ka Rekha Gupta ha ka Sngi Palei.
Ha kane ka jingïalang la leit ban ïashim bynta da u Myntri ka tnat ki kam pohïing jong ka sorkar kmie u Amit Shah bad u President ka seng BJP u J P Nadda.
Ka jingïakhun kaba nyngkong eh jong ka NDA kan dei ka ilekshon sha ka ïingdorbar thawaiñ jong ka Bihar, kaba la buh ban long ha u bnai Risaw-Naiwieng mynta u snem. Ka kynhun synrop NDA, ka don mynta ha ka bor synshar ha katei ka jylla, bad ki tyllong khubor, ki ïathuh ba u Nitish Kumar, Myntri Rangbah ka jylla, un ïalam ïa ka kynhun synrop NDA, ha ka jingthep vote. Kiwei pat ki jylla, kiba kynthup ïa ka West Bengal, Assam, Uttar Pradesh, bad Punjab, kin leit ruh sha ka jingthep vote ha kine ki ar snem ban wan.
U National General Secretary ka BJP uba dei ruh u In-charge jong ka Bihar BJP, u Vinod Tawde u la ong, “Ki nongïalam ka NDA ki la kut jingmut ban ïakhun ïa ka ilekshon dorbar thawaiñ lang, da kaba khlaiñ bad ïatylli, ha ki jylla ki ban leit thep vote ha kine ki ar snem ban wan.”
Katei ka jingïalang, kaba la ïashim bynta da ki Myntri Rangbah jong kiba bun ki jylla ba la synshar da ka BJP bad ka NDA, ka la paw da ka jingsngew ïatylli bad ka jingïalong paralok, ha kaba ki nongïalam ki la ban jur ïa ka jingdonkam ban ïatreilang ban pynïaid ïa ka ri sha ka jingthmu jong u Myntri Rangbahduh u Modi ïa ka “Viksit Bharat”.
Kiwei pat kiba la don lang ha katei ka jingïalang ki long u Myntri Rangbah ka Bihar u Vijay Kumar Sinha, u Myntri Rangbah ka Rajasthan u Bhajan Lal Sharma, u Myntri Rangbah ka Andhra Pradesh u Chandrababu Naidu bad u Myntri Rangbah ka Andhra Pradesh u Chandrababu Naidu bad u Symbud Myntri Rangbah jong u Pawan Kalyan, u Myntri Rangbah ka Haryana u Nayab Singh Saini, u Myntri Rangbah ka Madhya Pradesh u Mohan Yadav bad u Myntri Rangbah ka Rajasthan u Bhajan Lal Sharma, Myntri Rangbah ka Goa u Pramod Sawant, u Myntri Rangbah ka Maharashtra u Devendra Fadnavis, bad u Myntri Rangbah ka Tripura u Manik Saha.
