Shillong, Rymphang 21
Ka nongkiew lum ka Jylla, ka Rifiness Warjri, ka la long tang ma ka marwei ka kynthei na ka thaiñ Shatei Lam Mihngi ka Ri ban shah jied leit kiew ïa u lum Everest.
Kane ka nongkiew lum ka Jylla kaba dei ka NCC Cadet jong ka St. Anthony’s College hapoh ka NCC Group HQ Shillong, ka la shah jied hadien ba ka la lah ban pynpaw ïa ka jingtbit ban kiew ïa u lum Abi Gamin uba ka jingjrong ka long 7,300 metre uba don ha khappud ka India-Tibet. Kumta hadien ba ka la lah pyndep ban shah pyntbit ka la shah jied ban leit kiew ïa utei u lum bajrong tam ha ka pyrthei.
Kum ka kynthei kaba tang marwei ban shah jied na ka tnat North Eastern Region Direct-orate (NERD) ban leit kiew ïa u lum Everest, kane ka pyni ïa ka jingkut jingmut, ka jinglah ban shah bad ka sap ba kyrpang jong kane ka samla.
Kane kan pynshlur shuh shuh ïa kiba bun kiwei pat ki para nongkiew lum kynthei bad shynrang jong kane ka thaiñ ban pynpaw ïa ka jingtbit jong ki bad ban long kum ki khlur kiba tyngshaiñ.
