Shillong, Rymphang 23
U Virat Kohli u la lah ban khyrwit ïa ka spah run kaba 51 ha ka ODI na ka bynta ban pynlong ïa ka India ban pynliem noh ïa ka Pakistan da 6 wiket bad ban bteng ïa ka jingjop kaba ar ha ka Champions Trophy 2025 ha ka Sngi U Blei ha Dubai International Stadium.
Kane ka kynhun hapoh ka jingïalam u Rohit Sharma kum u kapten, ka la lah ban kynjoh sha ka thong da kaba ïoh 244 run pyrshah ïa katei ka kynhun kaba la rah teng ïa ka nam lahduh.
Ha kane ka jingïakhun kaba ar, u Kohli (not out) u la ïoh ban khyrwit 100 run kaba kynthup ïa 7 tylli ki ‘four’ ha ryngkat ka jingnoh synñiang da u paralok ba ïalehkai lang u Shreyas Iyer uba la ïoh ïa ka shiteng spah 56 run (5x4s & 1x6s), katba u Shubman Gill u la lah ban kamai 46 run.
Kham ha shwa haba shimti ïa ka jingkawang bol, ka India ka la lah ban ïalehkai bha na ka bynta ban pynlong ïa ka Pakistan ban kamai 241 run bad shah pynkhyllem 10 wiket ha ki 49.4 over. U Saud Shakeel bad u Mohammad Rizwan ki la lah ban ïatied lang 104 run. U Shakeel u la khyrwit ïa ka shiteng spah kaba 62 run bad u Rizwan u la tied 46 run. Hadien ka jingshah pynkhyllem noh kine ki ar ngut, ka Pakistan ka la shem jingeh ha kaba kam shym la lah ban kynjoh wat tang 250 run.
U Kuldeep Yadav u la long u nongkawang bol ba kynsai jong ka India da kaba khur 3 wiket.
Kumba ka long mynta u Kohli u la tam ïa u Sachin Tendulkar ban long u nongtied ba stet tam ha ka pyrthei ban kamai palat 14000 run ha ka ODI. U Kohli u la poi sha ka thong ha ka pali kaba 287, katba u Sachin pat u la poi sha ka thong ha ka pali kaba 350.
Lah ban kdew ba ha ka jingïalehkai ba la lah, ka India ka la pynliem ïa ka Bangladesh da 6 wiket.
Te kumta ka India kan pynkhreh ïa ka jingïakhun kaba lai pyrshah ïa ka New Zealand ha ka 2 tarik u Lber.
