Shillong, Rymphang 23
Ka Mawlai SC kaba long ka lahduh jong ka aïom ba la dep ka la ïai bteng ban bat ïa ka kyrdan ba ha khlieh duh ha ka Shillong Premier League 2024, hadien ba la lah ban pynliem noh ïa ka Sawmer SC da 1-0 kol ha ka sngi Saitjaiñ ha SSA Stadium kaba ha First Ground, Polo.
Katba ha kawei ka jingïakhun kaba la long kham shwa, u Samborwell Mynsong u la khur ïa ka hat-trick na ka bynta ban pynlong ïa ka Laitkor SC ban pynjem khnap ïa ka Ryntih FC haduh 8-1 kol.
Katei ka nam jop jong ka Mawlai ka la wan urlong lyngba u Donlad Diengdoh (36′) pyrshah ïa ka kynhun jong 10 ngut ki rangïalehkai ka Sawmer.
U Katba u Samborwell (20′, 47′, 59′) u la kylla long u rangïalehkai bapher ba khyndai (ba nyngkong dei ka Laitkor) ha kane ka samoi ban thep thep kol bun. Kiwei pat ki paralok jong u kata u Moonstar Nongsiej (19′, 53′), Wadskhem Marbaniang (48′) bad u Sandy Kharkongor (57′, 63′) ki la lah ban noh synñiang ha ka ban thep kol. Katba u Mangkara Sun (39′) u la ïoh ban thep shi kol na ka bynta ka Ryntih.
Kane ka jingjop ka la pynlong ïa ka Mawlai ban kamai 38 poiñ na ki 14 sien ïakhun, ha kaba ka la tam haduh 5 poiñ ïa ka Shillong Lajong FC kaba don ha ka kyrdan ba-ar ha kaba ka dangsah sa tang saw tylli ki jingïalehkai ba dangsah. Katba ka Laitkor ka la tam ïa ka Langsning FC na ka bynta ban ïoh ïa ka kyrdan kaba saw da kaba kamai 23 poiñ bad kamai 21 poiñ bad ka Laitkor ruh ka dang don ïa ka jingïalehkai ba dangsah. Na ka bynta ki ar tylli ki kynhun kiba la mad ïa ka jingshah rem, ka Sawmer ka don ha ka kyrdan kaba hynñiew bad ka Ryntih ha ka kyrdan kaba shiphew.
Ha katei ka jingïakhun, u Robertson Khongriah u la ïarap ban pynbuh bol na ka bynta u Donlad, u bym shym la pynnohei ïa katei ka kabu ksiar.
Ka jingïalehkai ha ka lah Sngi U Blei kan long hapdeng ka Shillong Lajong FC pyrshah ïa ka Nangkiew Irat SC ha ka por 11 baje mynstep, katba ka Nongrim Hills ïa ka Nongthymmai ha ka por 3 baje nohphai.
