Da ka mynsiem kaba khia nga kwah ban pynpaw ïa ka jingsngewsih jong nga halor ka jingsangeh noh ban shna ïa ka ïingskul ba thymmai ka St. Anthony’s L. P. School. Kum i nonghikai jong katei ka skul, nga pang ka mynsiem haba nga ïohi ba ka jingshna ïa ka ïingskul kaba thymmai la sangeh noh ban shna. Kane ka jingsangeh noh kan sa wan rah shibun ki jingeh ïa ki khynnah skul namarba mynta kim don ïa ki jaka pule kiba biang. Ki nonghikai ruh kin ym lah satia ban ai ka jinghikai kaba paka ïa ki namarba kim da biang ki kamra klas. Kumta nga sngew ba ka la donkam kyrkieh shisha ban ïoh shna kloi noh ïa ka ïingskul kaba thymmai khnang ba ki khynnah kin ïoh jingmyntoi ha shibun ki liang khamtam eh ba kin ïoh ka jaka pule kaba shngaiñ bad kaba biang lut ki rukom ai jinghikai kiba lah ban ïaryngkat bor bad ka juk kaba mynta. Khyndiat nga kwah ban pynpaw ïa ka jingshem jong nga ïa ka ïingskul barim kaba la dep ban pynpra mynta. ïa ka ïingskul barim, nga la ïohi da la ki jong ki khmat ba kam long shuh kaba shngaiñ ïa ki khynnah. Haba ki khynnah ki ïaid na kawei ka klas sha kawei pat ka ïingskul ka khih kumba khynñiuh u jumai bad ki bun ki bynta jong ki kamra klas ruh ki la pait la synjor lut bad kane ka lah ban buh ïa ki khynnah ha ki jingma jingmynsaw kiba ma ngi ngim lah ban tip ka lah ban jia ha kano-kano ka por khamtam eh ha ka por slap por lyer. Kum ka juk kaba mynta ki khynnah ki donkam ïa ki smartclass ban lah ban pyndonkam ban ïarap bad ban pynshai bha ïa ki khynnah hynrei kine baroh ngim lah ban leh namar ka kynroh jong ka ïingskul kam lah ban kyrshan. Kumta da ka mynsiem kaba pyrkhat na ka bynta ka jingshngaiñ ki khynnah skul nga buh ka jingkyrpad rit ha khmat ki bahalor ba kin pyndep kham kloi ban shna ïa ka ïingskul ba thymmai khnang ba kan ïaid beit ïaid ryntih ka pule ka puthi ki khynnah skul.
Khublei Shibun
I Nonghikai jong ka St. Anthony’s L. P. School, Shillong
