Bengaluru, Rymphang:
U Myntri Rangbah ka jylla u Siddaramaiah u la ong ba ka ïoh ka kot jong ka Karnataka ka khlaiñ bha bad ka BJP ka dei ban sangeh noh ka jingpynphriang ïa ki jingthok. U la kyrpad ïa ka liang pyrshah ban ïatreilang bad ka sorkar ban kyntiew ïa ka bha ka miat jong ki paidbah ka jylla.
“Ka ïoh ka kot jong ka Karnataka ka long kaba khlaiï bha ban ïaleh pyrshah ïa ki jingleh thok jong ka BJP. Ngin ïai bteng ban ïakhun na ka bynta ki hok jong ngi pyrshah ïa ki jingleh bymhok jong ka sorkar kmie ba la ïalam da ka BJP hapoh ka jingsynshar jong u Myntri Rangbahduh ka ri u Narendra Modi. Ngi ïeng ha la ki ktien bad ki briew jong ngi,” la ong u Myntri Rangbah haba jubab ïa ki nongïalam ka BJP u BY Vijayendra bad u Basavaraj Bommai halor ki jingkynnoh halor ka jinglong jingman jong ka ïoh ka kot.
U Myntri Rangbah u la ong ba ha ka por ba synshar ka BJP, ka ïoh ka kot jong ka jylla ka la shah pynhiar dor sha ka jinghiar dor. “Mynta katba ki dang shong ha ka liang pyrshah, ki kren kum ki nongkamai kiba khraw. Ka sorkar jong ngi ka trei shitom ban pynphai biang ïa ka ïoh ka kot jong ka jylla sha ka lynti kaba dei hadien ka jingpynïaid bakla bad ka jingkulmar kaba la wanrah da ki polisi pisa tyngka bym don jingkitkhlieh jong ka BJP,” u la ong.
U la ong ba ha ka por jong ka jingsynshar ka BJP, ki la shim ïa ki projek kiba shongdor hynriew shah palat ïa ka mang tyngka ba la mang, bad haduh ka 31 tarik u Lber, 2023, ki la iehnoh ïa ki Bill bym pat siew kiba shongdor T.2,70,695 klur na ka bynta ki tnad ba kongsan kum ki Public Works, Minor Irrigation, Water Resources, Urban Development, Rural Development, bad Housing.
Ka sorkar u Modi ka la leh ruh ïa ka jingbymhok kaba khraw ïa ka Karnataka ha kaba ai khajna, u la ong. “Ngi ai palat T.90,000 klur man la u snem beit beit sha ki paidbah lyngba ka DBT bad ki Subsidy, kynthup T.10,400 klur na ka bynta ki tymmen, kiba duna dkhot met, ki longkmie kiba la ïap lok, bad kiwei kiwei.
Kane ka sorkar pdeng ka noh synñiang tang 450 klur tyngka, kaba long kumjuh kumba long ha ka por ba long u Myntri Rangbahduh u Manmohan Singh. Kaei kaba ka BJP ka la leh na ka bynta ka Karnataka?” u la pynpaw.
U Siddaramaiah u la ong ba ka jingpynlut pisa jong ka Karnataka ka kham bha ban ïa ki jylla ba marjan kiba kiew shaphrang.
Ka Karnataka ka pynlut 15.01% na ka mang tyngka jong ka ha ka jingpynlut pisa, haba ianujor bad ka Maharashtra (12.74%), Tamil Nadu (10.58%), bad Telangana (11.58%), u la ong.
U la ong ba ka ïoh ka kot kaba khlaiñ bad ka jingsynshar kaba bha ka la khring ïa ki nongbei tyngka kiba shongdor T.10.27 lak klur ha ka jingïalang jong ka Invest Karnataka kaba dang shen.
