Hyderabad, Rymphang:
U Symbud Myntri Rangbah u Mallu Bhatti Vikramarka u la pynpaw biang ba ka “sorkar paidbah” jong ka Congress ka thrang ban pyndep ïa ka jingthmu jong ka bha ka miat bad ka long kaba kloi ban mang bad pynlut ïa kano kano ka pisa na ka bynta ban pyntreikam ïa ki skhim bha ka miat.
Ha ka jingïalang shwa ka mang tyngka bad ki kynhun SC, ST, BC, ki tnad ba dei peit ïa ki rit paid kaba la long ha Secretariat ha kine ki khyndiat sngi, u Symbud Myntri Rangbah u la bthah ïa ki heh sorkar ban pyntreikam ïa ki skhim seng kam seng jam na ka bynta ka jingmyntoi jong ki samla SC bad ST da ka mang tyngka kaba T.3,000 ha ki ar bnai ban wan hapoh ka ar klur tyngka.
U Vikramarka uba bat ruh ïa ka tnad pla tyngka, u la bthah ïa ki ophisar jong ki tnad ba dei peit ba kin pynkhreh ïa ki plan ban pyntreikam ïa ki skhim ai kam/jingpynbiang kiba heh.
U la ai jingmut ba ki heh ki dei ban siew kloi ia ka bai wai bad bai bam na ka bynta ki hostel bad ki skul sah. U la wad ia ki bill kiba dang sahteng katkum ki tnad kiba ïadei bad kine ki tiar bad u la bthah ïa ki heh ba kin shim ïa ka jingkitkhlieh ban ïoh ïa kine ki Bill ba la mynjur da ka tnad pla tyngka.
Hapoh ka Sub-Plan Act, u la bthah ïa ki ophisar ban pynlong ïa ka jingbuddien kaba khia ïa ka pisa kaba dei ban siew ïa ka tnad SC bad ST na kiwei pat ki tnad bapher bapher. Ïa ki Utilization Certificate kiba ïadei bad ki skhim sorkar pdeng dei ban pynpoi man ka por khnang ban ïoh pisa na ka sorkar pdeng, u la ong.
U la bthah ïa ki ophisar jong ka tnad SC bad ST ba kin pynlong ïa ka jingïalang bad ki ophisar jong ka tnad Energy, Agriculture, Forest, Horticulture na ka bynta ban sam ïa ki jaka sha ki Tribal katkum ka Forest Rights Act. Pynkhreh ïa ki plan ban shim ïa ki jaka rep soh Avocado, siej bad kiwei piat ki jingthung ban pynheh ïa ki jaka khlaw kiba rep da kaba pyndonkam ïa ka bor sngi bad ban ïoh ïa ka jingmih ha kine ki ar snem ban wan, la ong u Symbud Myntri Rangbah.
U la bthah ïa ki heh sorkar ban shimkhia ban pynbha ïa ki skhim sam um ha ki jaka sah jong ki SC, ST bad ban shim ïa ki lad ki lynti ban kyntiew ïa ka ïoh ka kot jong kine ki kynhun.
