Shillong, Rymphang 23
Ka Ri Bhoi United FC ka la long sa kawei pat ka kynhun kaba la lah ban pynthikna ban jam sha ka semi final ha ka Maitshaphrang Cup 2025 ba la pynïaid da ka KSU Umsning Circle, hadien ba ka la lah ban pynliem noh ïa ka Shkenshynriah (Rymbai) da 4-2 kol ha ka sngi Saitjaiñ ha madan Umsning.
Kane ka nam jop ka la wan urlong lyngba u Rohan Mannar, Donbok Lyngdoh bad u Meding Makdoh.
Ha kane ka jingïakhun quarter final kaba khatduh, baroh ar kynhun ki la pyrshang ban ïakhun tyngeh naduh kaba sdang. ka Shkenshynriah ka la pynkhih jar nyngkong lyngba u Niwan O Bareh ha ka minit kaba 15. Hynrei ka Ri Bhoi ka la pynphai kylla lyngba u Rohan Mannar (27) na ka bynta ban ïakhaid mar shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, ka Ri Bhoi United ka la thep biang sa lai kol lyngba u Meding Makdoh (62), Donbok Lyngdoh (70) bad u Fashioning Syngkli (81) hashwa ba uwei na ki para nongïalehkai u Shanbor Thangkhiew (84) un ïarap ban pynthep kol ïa ka Shkenshynriah. Haduh kaba kut ka jingïalehkai ka Shkenshynriah kam shym la lah ban pynphai bad ka Ri Bhoi United ka la khur ïa ka jingjop.
Ïa ka nam Man of the Match la khur da u Kenny Kharnaïor jong ka Ri Bhoi United ha kaba ïa ka trophy la sam da u Bah Ferdinald K. Kharkamni, President ka KSU NKHD Unit bad u Bah Luistar Lyngdoh, President ka FKJGP Ri-bhoi District.
Nalor ka Ri Bhoi United, kiwei pat ki kynhun ki la rung sha ka semi final ki long ka Sumer Football Club, Lamare FC bad ka Nangkiew Benris FC.
Te kumta ka semi final (1st leg) kan long ha ka 27 tarik mynta u bnai hapdeng ka Lamare FC pyrshah ïa ka Ribhoi United.
