Kolkata, Rymphang:
U nongïalam ka liang pyrshah ha Ïingdorbar Thawaiñ jong ka West Bengal, u Suvendu Adhikari ha ka Sngi U Blei u la ong ba dei ban pyntreikam ïa ka National Register of Citizens (NRC) ha West Bengal bad baroh ki seng saiñpyrthei ki dei ban kyrshan ïa ka jingpyntreikam ïa ka ha kane ka jylla khnang ban ïakhun tyngeh ïa ki mat kum ka jingwan buhai shnong bad ki nongthep vote “kiba long kum ki rngai”.
“Baroh ki sengbhalang ki dei ban kyrshan ïa ka NRC. Shisien ba ka BJP ka la wan ha ka bor ha ka ilekshon sha ka Ïingdorbar Thawaiñ jong u snem 2026, ngin sa pyntreikam noh ïa ka NRC ha Bengal,” u la ong.
U Adhikari u la ong ba ki jylla ba synshar ka BJP ki kyrshan ban pyntreikam ïa ka NRC bad u la kynnoh ba ka jingkyntait jong ka sorkar Trinamool Congress (TMC) ha West Bengal ka pyni ïa ka jingbym shimkhia jong ki ban khmih bniah “Ki jylla kum ka Uttarakhand bad Gujarat ki pyntreikam ïa ka, ka Maharashtra ka la sdang. Ka NRC ka dang ïaid shakhmat ha ki jylla ba la synshar da ka NDA,” ong une u nongïalam ka BJP haba ïakren bad ki lad pathai khubor ha Kolkata.
U la ong ba ka jingpyntreikam ïa ka NRC ka dei tang ka lad ban pynduh jait ïa ki “nongwan rung tuh”.
“Ka Bengal ka dei ka jylla khappud. Hajan jong ngi ki don ka Bangladesh-Nepal-Bhutan. Ngi donkam ban ithuh mano ba dei u nong India bad mano ba dei da ka NRC. Ki don ki nongthep vote beaiñ ha kane ka jylla, ki don ki Rohingya. Ka Election Commission kam don bynta eiei hangne”, la ong u nongïalam ka BJP.
Haba kynnoh ba ki don ki nongthep vote be-aiñ ha West Bengal, kiba wan buhai shnong na kiwei pat ki ri, une u nongïalam ka BJP u la ong, “Kumno u ‘riew lehnoh’ kum u Shad Radi uba ju tip ruh kum u Shab Sheikh u thep ïa ka vote jong u? U dei shi bynta jong ki kynhun lehnoh na Bangladesh kum ka Ansarullah Bangla. Ki pulit bad ki bor synshar jylla ki leh aiu? Ki peit sha kawei pat ka liang.”
Nalor kata, u MP barim ka Congress u Adhir Ranjan Chowdhury ha ka sngi U Blei u la ong ha ki lad pathai khubor, “Ym duna ïa ka 35 haduh 40 lak ngut ki nongthep vote thok ki don ha ka jingsynshar jong ka Trinamool Congress, baroh ngi tip haduh katno ka long kaba suk ban ïoh rung ha ka thup jong ki nongthep vote.”
Ha kajuh ka por, u nongaiktien ka TMC, u Kunal Ghosh, u la ong ha ki lad pathai khubor ba “Ki (BJP) kim dei ban leh ïa kano kano ka kam kaba ktah ïa ka imlang sahlang ha ka rukom kaba sniew.”
“Ka kam jong ka seng jong ngi hapoh ka jingïalam jong ka Myntri Rangbah ka jylla jong ngi ka Mamata Banerjee ka long ban pynbiang ïa ka “Roti, kapra aur makan” kaba ngi leh. Bad ka BJP namar kim lah ban ïalehkai bad ngi bad ki dei ki nongshun jong ka Bengal kumta ki pyrshang ban pynmih ïa ka jingïapher hapdeng ka niam. Ki briew ki la kyntait ïa kane”, la ong u Ghosh.
Dang shen, ka Myntri Rangbah ka Mamata Banerjee, ka la pynpaw ïa ki jingsngewkhia, da kaba kynnoh ba ka BJP, ka “pyrshang ban pynbud ïa ka Delhi Model jong ka ha Bengal bad pynïaid buit ïa ki thup nongthep vote, na ka bynta ban ïoh jingmyntoi ha ka ilekshon”.
