Ka skul St. Anthony’s LP School ka dei shisha ka dur ka dar jong ka Don Bosco Square, ym lah ban len, hynrei kito kiba ïoh ban ïuh kjat bad shong ha ki kamra skul ki sngewthuh ïa ka jingma kaba ap ïa ki.
Ngi ïohi shibun ki jingtei barim ba la shna da ki dieng, bunsien ki kem ding bad ïing noh tang shu don i phliah ding barit namar ka jingpyut bad jingtyrkhong ki dieng.
Ka St. Anthony’s L.P School ruh ka long ka jingtei kaba ap ïa ki jingma ba bun. Ngi lah ban ïohi ba ki rishot bad ki lyntang ki la bam kruiñ bad i kumba kan kyllon ha kano-kano ka por.
Ki khun jong ngi ki don hangto baroh shi sngi, ngi kwah ba kan don ka jingshngaiñ ïa ki khun. Ngi kum ki kmie ki kpa ngi ïohi ba ka don ka jingma ïa ka jingtei bad ngi tieng ruh ïoh ka ktah ïa ki mynsiem ksiar mynsiem rupa jongno-re-jongno.
Kumta, ngi la kmen haba ngi ïoh khubor ba yn shna thymmai noh ïa ka skul, wat lada don i jingbynnud ban pynpra ïa ka, hynrei ka jingshngaiñ jong ki khun ka dei ba wan nyngkong hakhmat jong ngi. Ngi kum ki ‘riew paidbah ngim sngewthuh balei donkam ban pynsangeh noh ïa ka jingshna. Ngi la nang tharai ba ki khun jong ngi kin shah shitom tang shisnem khnang ba kin ïoh ban shong ha ki kamra ba kham shngaiñ bad ba itynnat, pynban kumba long mynta ngi sngewsih ban ïohi ba ym pat sdang ïa ka kam.
Kumta ngi kyrpad ïa ki bor pynïaid ban isynei lem ïa ki khunrit jong ngi, kiba shong khapngiah mynta ha ki jaka ba la shu pynbiang malu-mala. Sngewbha isynei lem ïa ki khun rit kiba long ka lawei jong ka ri bad ka jaitbynriew ba kin lah ban ïoh dih ïa ka jingstad ha ka rukom kaba paka bad kaba shngaiñ.
Khublei shibun
Kaba burom ïa phi
M. Wanñiang
Kmie Khynnah Skul St. Anthony’
